時光倒流四分一個世紀，荷蘭足球傳奇古列治喺當年夏天，由意甲免費轉會車路士，轟動一時；之後維埃里、蘇拿喺西倫敦同樣膾炙人口。另一荷蘭球星柏金同時在1995年由國際米蘭登陸北倫敦投阿仙奴，配合領隊雲加及其法國子弟兵亨利同皮利斯，用快速地面進攻打造球會盛世，那些年嘅「外國革命」，令英超迷眼界大開。25年後，英超跟全球同樣受疫情打擊，但無阻車路士未開季已用咗2億英鎊簽6將，老細阿巴莫域治好心急俾第二季揸旗嘅名宿林柏特嚟個大考，睇下「林伯」揸住駕豪華跑「車」，破唔破到冇一位車仔領隊嘅阿巴麾下教多過3季嘅宿命，9月20日英超次輪即要迎戰原班人馬衛冕嘅利物浦，精彩囉。車仔密謀嘅「二次革命」，比上次更有霸氣，事關新兵除咗堤亞高施華係巴西老將，其他都極當打；單係上季喺德甲共入40球嘅迪姆華拿同夏維斯，已教車迷期待，但二人係咪杜奧巴同夏薩特二世，打過先知。最失意嘅，可能係上季先冒起嘅土炮新星美臣蒙特同譚美阿巴謙，話咁快就淪為配角。
日報