![阿仙奴](https://cdn.am730.com.hk/s3fs-public/styles/article_image/public/2023-05/15-18_1.jpg?itok=RgSHmqal)
阿仙奴又冧檔
阿仙奴季尾冧檔,再一次希望變奢望,但無論如何,來屆再踏歐聯舞台,將是近7季、亦是「後雲格」時代嘅首次,豐厚收入有保證;倫敦對頭人車路士及熱刺又要推倒重來,潛在同級對手減少。兵工廠管理方向冇問題,只要肯個別位置補強,傷痛過後,或是傳奇再現嘅前奏。
曼城如今太強,已變歐洲最頂級;要比較失望,2015/16年球季,阿仙奴在2月主場靠韋碧克絕殺,打敗李城後,一度追至跟對手只距2分,或更令廠迷沮喪。當年英超冇咁激,曼城只是羽翼漸豐,打一個阿古路;阿仙奴當年有基奧特、奧斯爾同山齊士,炮手級數高,神奇「狐狸」最後81分封王,係英超史上第6低分冠軍,雲格下台前最大遺憾,之後苦戰至今屆先再攞到亞軍。一個勝利陣容偷唔到雞攞英超,大敗白禮頓見到好多不足;好彩呢支「小兵」如今得分點極多,今夏要開水喉重點加入左閘、全能中場同一個高大中鋒,平衡兩大戰線,一眾年輕新星來屆喺大舞台又有機會再升呢,再試挑戰近20屆首個英超冠軍、挑戰曼城,仍有機會。阿仙奴如今冧檔,可能益咗下場要搶分護級、兼有地利嘅森林。