繼荷蘭之後，英格蘭今晚搵咗另一支冇份踢世界盃決賽周嘅球隊意大利拍跳，之後去到6月先同非洲嘅尼日利亞同中北美洲嘅哥斯達黎加交手，當熟習屆時分組賽嘅對手，呢類安排行貨，勝負意義又不大；但對於邊緣人，好似「容易受傷嘅男人」韋舒亞咁，呢輪國際賽埋門突然有輕傷退隊，打擊好大。
由細到大喺阿仙奴打起嘅韋舒亞，同好多所謂英格蘭新星，多數愈踢愈沉。「韋少」嘅球會師兄弟，好似基蘭基比斯同禾確特，今季先後離隊，亦入唔番國家隊。「三獅」領隊修夫基，教咗U21多年後上位，偏愛用新人，更強調選人準則「無畏無懼，以態行先」；國家隊內跟26歲韋舒亞同屬中場位置嘅好手甚多，競爭激烈。何況聽聞佢季尾前要肯減兩成半人工，先可以續約阿仙奴，咁屈辱，擺明焗佢走。
韋少季中開始多咗出場機會，只因攻中艾朗藍斯受傷多咗；叫韋少打防中拍住格列沙加，球會更十萬個不放心。如今兩頭唔到岸，佢都係無謂勉強，疊埋心水出國踢波，好似意甲咁，真正重生機會或許更大。