韓職搶閘開鑼，全球36個國家購入播映權，單係官方Twitter帳號，在上周五揭幕戰全北汽車鬥水原藍翼，閉門作賽下錄得180萬人上線收看；首輪3天比賽過後暫時相安無事，呢個頭炮好似佢哋總統嘅民望一樣，打咗一場重要勝仗。首輪6場主隊喺閉門作賽下錄得4勝1和1負，韓職嘅走勢本月仍係世界球迷焦點之一。成功從來唔易複製，韓職上月尾已為職、球員做了逾千次測試，確保對新冠肺炎呈陰性；喺直播只見安全措施做足，兩軍賽前列陣向對方鞠躬代替握手，場上唔俾吐口水，各有自己名字嘅水樽，換出後唔理球員係咪未回到氣，要即時戴番個口罩返後備席。
講紀律性，南韓人冇問題，但歐洲各大聯賽如想急於復賽，諸多限制又要賽前賽後成日叫班球星戴住口罩，呢條路唔易行。全北場波作全球免費直播時，攝影師對住個「吉場」冇乜好影，鏡頭唯有不斷捕住教練團同後備席，只見個個戴住大大個贊助商「H」字又堅型嘅深綠色口罩，呢個汽車生產商，應該先係韓職復賽嘅大贏家。