歐洲主流球季似完未完，剩低兩場歐洲盃賽決賽未踢。可惜英超早收爐，單計剛過去周末各地嘅盃賽決賽，包括西、德、葡及蘇足盃，統統有錢都冇得喺香港電視睇直播，未能目睹球王美斯戰敗，或者「拜仁孖寶」列貝利同洛賓告別戰等大場面，感覺上似抖暑多過等大戰來臨。歐霸盃史上首次由兩大倫敦球會對決，留意嘅人多了，歐洲足協安排喺阿塞拜疆打，受影響只係一小撮想撐場嘅擁躉，但對普羅以億計球迷嚟講，尤其亞洲地區，賽事安排喺周中香港時間深夜開波，反而係返朝九晚五嘅球迷最大顧慮。主事人往後可以考慮安排分兩個周末打，或者既然歐霸冠軍已升格到即取來屆歐聯一席，兩場決賽打叠在歐洲兩地，分周六及周日上演，季尾氣氛更激。
球迷冇追開，但又冇俾錢買收費電視新plan，要諗計睇呢兩場大戰。周三先嚟歐霸決賽，決心同士氣較車路士好嘅阿仙奴，反而被外界稍看淡，估計有力喺「歐霸專家」艾馬利帶領下，一嘗球會四分一個世紀以來首個歐洲賽冠軍。