英超早已人情味淡薄，現役做多過3年嘅英超領隊，得番5人，包括紅軍高洛普及藍月哥迪奧拿。阿仙奴炒艾馬利之前，對上一次喺季中炒領隊，已係近四分一世紀前，麾下後防Big Four如磐石穩陣嘅格拉咸，因收回佣丟職。這間在倫敦已淪為二流嘅大會，由「光頭中佬」龍格保接燙手山芋，唔易短時間內撥亂反正。阿仙奴唔係冇鬥心，係人腳質素同比賽意識大有問題；頂住檔做副手嘅「大梅」梅迪薩卡，喺場邊見到同胞「細梅」梅斯達菲俾諾域治射手迪姆普基係咁爆過，又撻低兼常攤開雙手扮無辜，有乜感受？
中堅不穩問題，源於防中一職多年來，冇認真解決過，令外圍防線一遇快攻任人漁肉，先係兵工廠嘅死症。格列沙加不配做隊長，亦唔係防中之材；奧巴美揚擅長快速邊路突擊，做埋隊長要經常走去同球證拗數，嘥時間嘥體力；加埋超高薪嘅奧斯爾已變「異物」，格格不入。已不懂贏波嘅阿仙奴，周中匆匆返主場，面對突擊更快速嘅白禮頓，或者已係龍格保攞正牌嘅最後機會。