英女王伊利沙伯二世逝世，英國皇室喺當地星期一舉行國葬，送別一代女王。根據多個機構數據，估計全球大約有41億人收睇今次葬禮，差唔多係地球上一半人口都睇緊。比起1997年戴安娜喪禮嘅25億觀眾人數，有過之而無不及。
播《Emoji大冒險》成網路熱話
英國民眾當然更加想目送女王最後一程，當地免費電視台BBC同ITV星期一早上都有直播全個過程，第4台就播放女王生平紀錄片。而由派拉蒙擁有嘅第5台，居然選擇播電影，套戲仲要係同女王、皇室冇咩關係。
答案︰2017年嘅電影《Emoji大冒險》。
睇落九唔搭八，但係呢個舉動，成為咗網路熱話。有網友甚至話，即使睇緊女王喪禮，都冇辦法唔諗起《Emoji大冒險》。
但係根據外媒報導，Channel 5星期一早上係會播放適合兒童收睇嘅節目，之前同一時段都播過Thomas火車頭同Paddington Bear大電影。加上女王國葬日係英國全國假期，播《Emoji大冒險》似乎係想俾冇訂閱串流平台嘅家長，多一個節目選擇。
原文刊登於 Yahoo娛樂LOL，am730獲授權轉載
立即更新/下載AM730手機APP 體驗升級功能
