「乳健同行2023」有近 2,000 位粉紅健兒參加（香港乳癌基金會圖片）
香港乳癌基金會今年10月20日喺山頂舉行年度慈善步行籌款「乳健同行 2024」，提高公眾對乳癌嘅認識，以及推廣乳健嘅重要性，基金會今年再度委任歌手李樂詩（Joyce）為基金會大使。2021年曾確診乳癌嘅Joyce喺宣傳片呼籲大家喺「粉紅十月」帶同心愛的寵物參與步行籌款，一齊穿着粉紅服飾，喚起社會對乳癌嘅關注。
李樂詩籲定期乳健檢查
Joyce 2021年因身體檢查發現確診乳癌，慶幸及早發現，免卻接受化療或電療，又果斷決定接受手術切除兩邊乳房，但四度接受乳房重建手術均告失敗，令佢深受打擊，幸得親友陪伴，先可以釋懷踏上康復之路。佢希望大家定期接受乳健檢查，因為及早發現係治療關鍵。
「乳健同行 2024」將會於10月20日早上8時30分至下午1時喺山頂舉行，籌得款項會用作推廣乳健教育、為乳癌患者及家人提供支援，以及乳癌研究及倡議等工作。
