Ray Online｜官員議員「落場騷肌」拍宣傳片　為杭州亞運打氣

杭州亞運會今年9月舉行，香港方面，幾個司局長同議員都「落力」拍宣傳片，呼籲大家為國家以及香港運動員打氣。文化體育及旅遊局上載到社交網站嘅短片可見，伴隨住節拍強勁嘅背景音樂，登場嘅首名官員就係文體旅局局長楊潤雄。之後幾個司局長都有「小劇場」，律政司副司長張國鈞見大家咁齊人，話乜大家都咁落力做運動呀，佢話本身都好鍾意運動，楊潤雄就話咁就啱啦！今年9月杭州亞運，大家一於做多啲運動備戰。身邊嘅立法會議員鄭泳舜都和應，話「操Fit啲，為香港運動員打氣」。短片可見，佢哋專注利用各式各樣嘅健身器材做運動，仲近鏡影佢哋啲肌肉呀！

立法會「女將」秘密練兵場地單車　向楊潤雄下戰書

當然唔係「全男班」，仲有女將立法會議員「雙陳」陳凱欣和陳家珮加入，話知道今屆亞運有場地單車項目，所以嚟練習。陳家珮仲透露已經秘密練兵一段時間，即場向楊潤雄發出「戰書」，話一於切磋吓。楊潤雄身為主事官員當然應戰，即場比拼。其他人就喺側邊打氣，最後一齊祝願國家舉辦亞運會以及亞洲殘疾人運動會圓滿成功，呼籲大家一齊支持國家和香港運動員。