Ray Online｜尚海龍扮政府向司機推銷的士車隊 稱被對方「頂咗好幾次肺」
周不時有市民甚至遊客投訴的士服務質素，政府就提出修例，引入「的士車隊」改善服務。立法會相關法案委員會今日開會討論，選委會界別立法會議員尚海龍突然「show」出3張的士收據，原來佢噚晚專程搭咗3程長途的士做實地考察，笑稱自己「是但扮演政府推銷呢個政策」，點知的士司機「頂咗我好幾次肺，話我唔貼地」，仲笑佢好傻呀，睇嚟尚海龍為咗做實驗都好大犧牲。
尚海龍話噚晚幫襯嘅司機都安裝咗HKTaxi、的神、飛的、小紅的等五花八門嘅APP，司機面前有5、6部電話，司機回覆話識用APP、搵到食嘅全部都係年輕人。尚海龍會上就話如果再由的士車隊推出各自嘅APPS，搵唔到客嘅話，「車隊班主、牌主一定死啦」，佢要求政府「集中火力」推出統一「call車」APP，不過政府就建議由車隊自主提供「call車」APP啦。
amJetso送太興鮮臘腸 👇立即按此參加
