2023-10-18 15:53:34

Ray Online｜新要求議員離開大會多於1小時需申報　梁君彥希望議員「識做」

報章早前統計部分立法會議員出席率欠佳，「班長」廖長江之後發千字文為議員定下表現指標，叮囑佢哋要減少應酬。不過睇嚟「溫馨提示」嘅作用都唔夠，據了解廖長江上星期聯同立法會內務委員會主席李慧琼，同功能界別、選委界議員舉行協調會議，期間再提出新要求。

梁君彥希望議員日後「識做」

據了解為希望提高出席率同投票率，嚟緊要求喺立法會大會、內務委員會同埋財務委員會三個重要會議上，非記名表決至少要有一半議員在席，而喺三個界別，即係直選、功能界別同選委界，亦分別至少要有各一半議員出席。另一個新規定係立法會大會期間，如果議員有事需要離開大樓1個鐘以上，需要透過WhatsApp群組申報。

立法會主席梁君彥回應話，履行公職係議員嘅責任，公眾亦對議員有一定期望，希望議員日後「識做」。被問到喺今日會議上運作順唔順利，梁君彥就話立法會會議運作好透明，相信公眾都「有眼見」。

李慧琼認為議員表決在席率理想

立法會內會主席李慧琼今日喺大會舉行期間，召開記者會講述嚟緊去北京參加全國人大常委會嘅內容，記者會大約舉行咗25分鐘之後，李慧琼話由於要落去會議廳投票，要離開一陣。佢上返嚟記者會之後解畫，話以前就算記者會途中撞正要投票，都未必會離開記者會。但留意到媒體報道同埋市民反應，同廖長江一齊鼓勵議員提升出席率，一定要以身作則。李慧琼又話議員履職開會，積極反映民意，做好議員工作係責任，認為今日議員表決在席率理想，反映大家重視各界意見，而履職表現沒有最好、只有更好。