Ray Online｜梁君彥自稱和張宇人是高危群組 呼籲接種流感疫苗(陳芷晴攝)
本港即將迎嚟流感高峰期，立法會喺復會首日就安排議員接種流感疫苗，今次有超過50個議員響應呼籲打針，比嚿年多咗大約60%，亦有已經打針嘅議員今次都專程嚟打氣。立法會主席梁君彥致辭嗰陣話，依家天氣特別舒服，之不過亦係冬季流感高峰期，喺新冠疫情期間，市民配戴口罩，感染流感機會較少，免疫力亦下降，所以今次冬季流感可以話係來勢洶洶，帶嚟嚴峻挑戰。
▼按圖放大睇議員打針情況▼
梁君彥自稱和張宇人係高危群組
梁君彥形容流感會「殺人」，為自身、家人健康，接種疫苗就係預防流感同併發症最有效嘅方法，特別係高危群組，佢自稱連同73歲嘅議員張宇人就係高危群組啦。被點名嘅張宇人打針嗰陣，議員陳凱欣不停喺側邊「打氣」，叫姑娘有幾大力打幾大力，仲話張宇人皮厚呀！
醫務衞生局局長盧寵茂致辭嗰陣就話，適逢復會首日，見到議員充滿活力重歸議會。佢提到今年已經有21個兒童嚴重流感個案，當中75%冇接種流感疫苗，可見打針係可以有效預防流感同併發症。而今年區議會選舉12月10號舉行，盧寵茂將區選同打針都拉埋關係，話到時已經係流感高峰期，如果大家想選舉安心啲，可以預先接種疫苗。而各位議員落區推動選舉嗰陣，同一時間都可以推動打針呀。
amJetso送太興鮮臘腸 👇立即按此參加
