Ray Online｜杜拜王子離港因開幕禮降格？沈運龍：出席官員有變
近日成為傳媒焦點嘅杜拜王子Sheikh Ali Rashed Ali Saeed Al Maktoum，早前以「緊急事務」為由需要回國處理，令到原先喺3月28日家族辦公室開幕禮需要延期。今日《明報》專欄李先知就引述商界消息話，杜拜王子之所以突然離港，係同港府態度有關，包括開幕主禮嘉賓不斷更換，甚至「降格」，令杜拜王子「無癮發嬲即刻走」。
杜拜王子阿里曾以歌手身份出道。
《明報》專欄李先知提到，開幕主禮嘉賓由財爺陳茂波，降格到財經事務及庫務局副局長陳浩濂，之後再降格到投資推廣署長，最後連署長都不出席。專欄又提到香港中東經貿協會會長沈運龍「請唔到人」，導致雙方出現齟齬，杜拜王子於是決定取消開幕禮。
沈運龍：唔得閒都正常 不至於任何拗撬
沈運龍今日(5日)朝早就喺電台解畫，話開幕禮原本有好多官員答應出席，「不過之後香港發生咗好多事，有啲病咗，有啲中咗招，出席官員有所改變先畀人感覺降格，王子嗰邊可能覺得唔舒服呢？」但沈運龍認為「唔得閒都正常，不至於任何拗撬。」沈運龍又話，有傳媒報道資訊有誤，引嚟好多「反政府YouTuber」指摘他「搭雞掤呃香港」，所以要出嚟發聲澄清。
amJetso請食南記堂食一人牛乳火鍋 立即按此參加👇
