民建聯「香港年度漢字評選」出爐，「興」字壓倒性勝出。(陳芷晴攝)
民建聯由2013年開始舉辦「香港年度漢字評選」，繼續由民建聯創會主席曾鈺成親自寫毛筆字揭曉今年年度漢字，就係「由治及興」嘅「興」字啦。
漢字評選盛況：
今年有4,612個市民投票參與，而第1名嘅「興」字有1,604票；第2名「治」字有553票；第3名嘅「復」字得票都好接近，有539票。曾鈺成宣布結果嗰陣，提到第1名係呼之欲出，「興」字最常用係興旺、興起、振興 ，反映出大家希望「由治及興」嘅願望。曾鈺成分析「興」字嘅組成，中間部分係同心合力嘅「同」字，兩邊係「𦥑」字，係一個好重嘅石器具，下方嘅篆書結構係「兩隻手」，結合起嚟，「興」字有同心合力一齊抬起嘅意思。佢認為代表要「由治及興」、振興經濟，唔能夠只靠少數人。
民建聯副秘書長葉文斌就負責揭曉其餘結果，提到第2名嘅「治」字，係管理、治理，同近年政府管治有關。而第3名嘅「復」字就係恢復嘅意思，相信同社會復常有關。
今次評選係由10位評審委員，包括民建聯會務顧問譚耀宗、立法會主席梁君彥等，先揀出10個候選漢字，分別係「興﹑運﹑選﹑簡﹑民﹑夜﹑復﹑治﹑旅﹑守」。葉文斌感謝呢10位社會知名人士擔任評審委員，令到評選活動更加具代表性同公信力。
會員免費換香港麥當勞叔叔之家慈善基金「愛❤迎蛇年利是封」及揮春！
