羅淑佩出名係MIRROR成員陳卓賢Ian嘅粉絲。(資料圖片)
政圈都知房屋局常任秘書長兼房屋署署長羅淑佩係MIRROR成員陳卓賢Ian嘅粉絲。今日(31號)就有立法會議員獻計，建議兩人一齊擔任禁毒大使，唔通羅淑佩有機會「自肥」？
立法會大會今日討論口頭質詢，關於青少年干犯同毒品有關嘅罪行。新民黨立法會議員何敬康就建議邀請羅淑佩同Ian破天荒合作，向後生仔宣傳禁毒。鄧炳強回應話，當局會繼續採用青年接受嘅方式宣傳，又賣廣告話其實保安局禁毒處本身都有吉祥物㗎，叫「冬冬」同「希希」，不過佢哋可能冇MIRROR咁出名，冇咁多人識。
被捕青年數目下降
鄧炳強交代，涉及毒品而被捕嘅青年數目有下降趨勢，由2014年嘅829人，下降至舊年嘅659人。不過，網上販毒成為近年趨勢，鄧炳強話執法部門會派網上卧底引蛇出洞，喺交收現場一網成擒。
