立法會餐廳營辦商今日邀請議員試食新菜式。(梁君彥FB)
立法會餐廳不知不覺已經轉手近9個月，為咗更了解食客口味同炮製更多啱食嘅菜式，今日(12日)專誠邀請咗一班議員去餐廳議員專區試食新菜式。主席梁君彥喺facebook專頁話，餐廳好貼心咁推出咗多款開胃時令新菜式，佢同試食嘅議員都好畀心機提供意見，相信餐廳一定會從善如流，「盡力為食客做足一百分！」
梁君彥讚營辦商迎難而上
梁君彥話，要贏得議員及其他立法會大樓使用者嘅歡心絕對唔容易，不過營運商都好有誠意和決心迎難而上。佢又提到，雖然通脹壓力增加、經營成本上漲，用環保物料做嘅外賣餐盒成本都唔輕，不過為咗爭取更多食客幫襯，餐廳決定獨力承擔兩蚊外賣盒嘅費用，唔再轉嫁畀食客，大讚餐廳繼續用抗通漲價格服務大家，「值得畀like！」
梁美芬成「立法會試味委員會」委員
睇返梁君彥上載嘅相，見到試食嘅仲有秘書長陳維安、飲食界限宇人，同埋民建聯陳勇、新民黨容海恩、經民聯梁美芬同陸瀚民(Benson)、陳振英等議員。
Benson之後喺網上大爆，原來試食一共有8道新菜式，包括燒春雞意粉、鮮蝦雲吞麵，又話以前會推介嚟立法會嘅朋友飲招牌維他奶紅豆冰，今日試食之後就決定推薦埋梅菜扣肉。梁美芬亦都有喺facebook分享自己做咗「立法會試味委員會」嘅委員，仲話好期待餐廳推出更多美食！
amJetso送太興鮮臘腸 👇立即按此參加
