2024-09-03 12:25:30

Ray Online｜鄺美雲製作愛國主義教育主題曲《我們的家》　即席演唱最愛段落

政府積極推動愛國主義教育，相關工作小組用咗1年時間製作主題曲《我們的家》，負責作詞同演唱嘅藝人兼愛國主義教育工作小組分組委員鄺美雲話，一直想製作有溫度、溫暖嘅歌，而呢首歌可以表達香港人心聲，唱出愛國情懷。

今日係抗日戰爭勝利紀念日，愛國主義教育工作小組趁今日宣布推出主題曲。主唱鄺美雲話香港過去經歷好多風雨，一直想製作一首溫暖嘅歌。鄺美雲話已經將歌曲帶到社區，同3歲去到10幾歲嘅小朋友一齊唱，佢覺得無論男女老幼都好適合唱呢首歌，因為好表達到香港人嘅心聲。佢留意到小朋友唱嗰陣好熱情，因為歌詞內容好歡喜，內容關於一齊愛護國家，唱歌嗰陣會自然表露表情同笑容，當充滿愛嗰陣唱會特別好聽。

除咗播放歌曲，鄺美雲話特別鍾意其中一段，問傳媒可唔可以等佢即場唱，跟住就唱出第3段歌詞「情繫國家，我們這一個家。和諧共處，在同一屋簷下。同步挽手，我們一起去愛護他。無懼波折，逆境更要自強。」

鄺美雲無收版權費

至於愛國主義教育工作小組組長李慧琼透露用咗大約1年製作歌曲，由政府新聞處特別製作卡啦OK版，而鄺美雲好大方，冇收版權費，所以製作成本有限。佢仲話由鄺美雲負責主唱，最表達到全港市民對國家嘅愛護。而佢同小組成員都會練習唱呢首歌，不過時機未成熟，有機會會同大家分享。佢又話唱歌唔使咁多限制，最重要表達情感。即將迎嚟國慶，李慧琼話會邀請團體喺國慶前後唱呢首歌送畀國家，亦製作咗USB手指派畀所有中小學。