龍漢標今日喺議事堂高歌一曲。(資料圖片／蘇文傑攝)
立法會復會第二日，一眾議員繼續爭取機會發言。選委界尚海龍噚日發言期間話好榮幸可以成為復會後首個議員提案，就專程帶個鑼入議事廳「打鑼」，今日就有議員高歌一曲，仲話係受到尚海龍啟發？
原本打算靜靜地坐喺度
話說今朝立法會大會繼續討論由尚海龍動議嘅《跟進國家主席習近平2022年6月30日的重要創新科技指示》議案，當輪到地產及建造界龍漢標嘅時候，就話自己唔係創科人，所以本身冇諗住發言，「最好都係靜靜咁坐喺度，聽下各位同事嘅真知灼見」，但噚日聽到尚海龍嘅「開鑼發言」之後就決定發言。
自嘲唔係「立會好聲音」材料
龍漢標之後話，聽到發言嗰刻佢腦海即刻浮現出歌手徐小鳳唱緊《順流逆流》，然後佢更即席喺發言期間唱咗幾句：「幾多艱苦當天我默默接受，幾多辛酸也未放手。故意挑剔今天我不在乎，只跟心中意願去走。」佢之後仲同主席梁君彥補一句，「主席，你知道我根本上唔係『立會好聲音』嘅材料嚟。」
近期社會都有意見要求政府「撤辣」，龍漢標又重提佢嚿年整過一套動畫解釋點解要「撤辣」，形容自己當時有「孤身走我路」嘅感覺，結果一年後「撤辣」成為咗議事堂嘅主流意見，呼籲政府唔好再猶豫，將「辣招」直接送入「歷史嘅堆填區」。
