何永賢(左二)、戴尚誠(左三)、歐陽文倩(左一)等齊齊到大本型食早餐。(何永賢FB)
今日係香港回歸27周年，房屋局局長何永賢出席完升旗儀式暨慶祝酒會後，就轉到房委會旗下嘅油塘大本型商場，同副局長戴尚誠、政治助理歐陽文倩等同事幫襯新開張嘅茶餐廳。佢一邊食住唔同港式口味嘅招牌厚滑蛋治，一邊了解3位年輕、認真、實幹型女老闆嘅創業故事。
上晝喺大本型買到唔少心頭好
何永賢話，老闆喺租呢個舖位之前，認真喺商場足足觀察咗一個月，認為鄰近港鐵站的位置人流暢旺，又有屋邨人口支撐，因此認為呢度係不二之選。佢哋一行人之後就轉到時裝店同水果店，何永賢形容屋邨商場嘅時裝店都有唔少寶藏，佢就一眼睇中咗一件淺綠色衫，水果店亦都有唔同地方嘅新鮮水果選擇，短短一個上晝已經買到唔少心頭好。
適逢七一大本型都推出咗特別優惠，消費滿71元就可以換領商場嘅「幸福家族」禮品，何永賢一行人都一人拎住一份，齊齊「打卡」盡興而歸。另外，佢又回顧上任兩周年嘅工作，提到首批簡約公屋出年首季會落成，亦預計2026/27年度起好3萬伙簡約公屋，填補短期公屋供應嘅短缺，當局未來會繼續努力，為人民對美好生活嘅嚮往奮鬥。
