已退役嘅東鐵綫「烏蠅頭」列車，已經進駐新開嘅灣仔海濱「水上運動及康樂主題區」第四期。(林俊源攝)
俗稱「烏蠅頭」嘅港鐵東鐵綫中期翻新列車，自舊年5月東鐵綫過海段通車前就消失於公眾眼前，其中兩卡今年9月已經進駐灣仔海濱嘅「水上運動及康樂主題區」，聽日(21號)就會正式開放畀公眾參觀。
「海濱站」休憩空間24小時開放
兩卡「烏蠅頭」車廂設計各有不同，其中第一卡車廂將會分成兩區，一區為聖誕限定嘅黑白手繪風中央車站設計，另一區就係原汁原味保留，但加咗聖誕裝飾點綴嘅「烏蠅頭」車廂。至於另一卡廂就已經拆走晒座椅同扶手，變身成一個多用途工作室，畀社區團體舉辦活動或者工作坊。
港鐵話，車廂每日朝十晚十開放，而車廂所在嘅「海濱站」就係24小時開放嘅休憩空間。發展局就話，聽日同步啟用嘅「水上運動及康樂主題區」第四期除咗「烏蠅頭」，仲有梯級式月台、觀景台、圓型多用途廣場同夜光步道等，方便遊人用唔同角度欣賞維港景致，適逢聖誕節場地更添上以鐵路為主題嘅聖誕裝置。
此外，發展局話連埋主題區首三期，成個主題區聽日起將會全面開放，連接堅尼地城同炮台山嘅港島北海濱長廊，總長度增至9公里。
amFUN聖誕狂賞🎁狂送UNICO迷你遊戲機、主題公園門票、Panasonic鏡燈👉
