今次呢間真係澳門必食，呢間非常地痞、夠晒地道嘅粥店—倫記，位於小巷之中。由於粥店收凌晨一點，所以我同朋友食完晚飯，散個步，就截的士過去喇。
一上的士同司機講倫記，佢都唔太清楚喺邊，唯有讀個地址俾佢聽啦，點知佢就開始嚟料！「咩人介紹你去㗎？咩話？當地人？呢個朋友都正一XX！介紹埋你去啲咁嘅XX地方食嘢！」全程車講盡難聽嘅說話，屋企人同器官俾佢用齊晒，不堪入耳！仲想夾硬車我哋去所謂澳門人成日去嘅筷子基「X記」，我諗我哋遇到傳說中嘅「黑的」。由於我哋都係堅持去倫記，個司機就開始恐嚇我哋話嗰度好偏僻，一定唔會有的士出返嚟！仲話條街又靜又僻好危險，車都入唔到，結果停咗喺一個冇雷公咁遠嘅地方，落車仲鬧多句：乜你兩個咁折墮。好，我忍你。
搵咗一輪，終於安全抵達粥店。叫咗個最出名嘅蔥花雞蛋腸粉，同埋倫哥推介嘅黃沙蜆肉碎粥，一試就知道今次不枉此行！布拉腸粉即叫即做，口感嫩滑如絲，蝦米鮮香彈牙，加埋蛋皮更添一份蛋香，美中不足係腸粉米香差咁啲啲。再食一啖粥，不得了！配料豐富，每一啖粥都係粒粒飽滿蜆肉，倫哥仲話呢個組合係佢自創，全澳門得佢呢度有得食！粥底綿滑味濃，足料得嚟完全冇味精，食完一啲都唔頸渴！當晚其實啱啱先食完5道菜晚餐，飽到上心口，結果都係忍唔到口食晒成碟腸粉兼成碗粥，可想而知幾咁好食！今次真係10粒星推介！
倫記軟滑腸粉 澳門沙梨頭沙欄仔街26號泉彩樓地下
蔥花雞蛋腸粉 $23
黃沙蜆肉碎粥 $25
人見人愛嘅小白，嗲到爆！
立即更新/下載AM730手機APP 體驗升級功能
