鄧炳強(左)形容自己呢排「滿腦子」都係立法工作嘅內容。(鄧炳強FB)
政府依家正全速進行《基本法》23條立法程序。要出席晒咁多場法案委員會會議嘅保安局局長鄧炳強，今日(10號)就喺社交網站發帖，形容自己呢段時間「滿腦子」都只有立法工作嘅內容，同團隊唔係喺立法會就係喺會議室渡過周末，「可謂廢寢忘餐。」
鄧炳強又話，午飯時間都只係簡單食個麵包，希望爭取時間開會討論，慶幸自己有一個高效率團隊，「大家上下一心，火力全開」，仲話目標只有一個，就係盡早立法。
聽日繼續加會討論23條
立法會喺23條條例首讀二讀後，隨即加開法案委員會討論，包括呢個禮拜六日。立法會今日再公布，聽日星期一會繼續加開會議，即係連續4日召開法案委員會。至於原定聽日下晝舉行嘅福利事務委員會，亦已經改期讓路。
amJetso送太興鮮臘腸 👇立即按此參加
