Ray Online｜教育局邀請議員跟團考察被質疑阻區選工作 今撤回安排
公民與社會發展科要求中學生去內地考察，教育局亦邀請立法會議員喺12月2號至5號，跟團參加陝西歷史文化及航天科技內地考察團，可以直擊課程安排。之不過，一班議員唔係好滿意安排，今日就宣布唔跟團啦。
事緣上星期交上立法會內務委員會討論嗰陣，議員紛紛質疑考察團成效，新民黨主席葉劉淑儀更加反問教育局係咪唔記得咗12月10號係區議會選舉？擔心喺選舉前離開香港，會阻礙助選工作。今日負責協調安排嘅立法會教育事務委員會主席梁美芬就去信議員，引述教育局話考察團涉及超過100個學生，學校難以改期或者更改行程。為免對學生團造成額外安排上嘅困難，決定畀學校保留原有行程如期出發，而議員就唔參加今次視察工作啦。
Ray Online｜教育局邀請議員跟團考察被質疑阻區選工作 今撤回安排
原本有11位議員參加
梁美芬又喺信中備註提到，教育事務委員會早喺10月6號會議徵詢委員意見，當時冇任何人提出意見。之後有11個議員表示會參加考察團，再去到11月7號嘅教育事務委員會會議，同樣冇委員表達任何意見。
佢強調原本隨團目的係為咗檢視學生團行程質素同埋成效，議員角色係類似「考官視學」，學生團唔係為議員而設。佢話教育事務委員會一直關心公民與社會發展科進展，會用其他形式繼續跟進科目發展。
amJetso送太興鮮臘腸 👇立即按此參加
