七台大匯演。
七間傳媒機構搞咗個「大匯演」呼籲市民投票。呢招喺1991年華東水災已用過，我唔係要討論個主題，我只係想知，今時今日呢個YouTube、IG、TikTok年代，呢種自稱「七大」電子傳媒嘅大騷到底有幾大作用呢？
1) 幾台「聯播」呢種形式以前係超級work嘅，因為大家冇得揀、焗住睇，但今時今日，電視以外仲有好多選擇，而家七個電子傳媒嘅影響力，加埋都只係觀眾世界嘅一部分，網絡平台「小薯茄」、「試當真」嘅觀眾群可能更大更廣。加上以前呢啲大匯演，集結到唔同嘅唱片公司一齊參與，四大天王都會出席唱歌，劉德華更試過「心口碎大石」。今次除咗《中年好聲音》同《聲夢》一干人等，你見唔見到華納唱片嘅MC、英皇嘅張敬軒、環球嘅張學友、陳奕迅出席？
2) 群星合唱加做個大騷，無論係大小籌款、奧運亞運、國慶回歸、沙士Covid打氣，都用過呢一招，先唔講過唔過時，但唔同訊息，應該用唔同傳播方式，係個傳播技巧嘅101。籌款節目娛樂大家之餘呼籲觀眾捐款，只要節目做得好，訊息夠清楚，都可能會有用嘅，但所有主題都用返同一條橋，係唔係可以解決所有問題呢？唔理訊息係乜，都用同一做法，到底係真係想推動件事，定係只係識用一招呢？
所謂嘅七「大」電子傳媒，今時今日只係七「間」電子傳媒，個「大」字過晒時啦。咁多年來唯一不變嘅係，無論講緊幾多電子傳媒，個騷都係由TVB牽頭。其實喺現今嘅生態之下，會唔會由唔同媒體各有各用自己方法，先會令到多啲人知道個訊息？繼續用呢種聯播大騷模式，到底真係推緊件事，定係只係想話俾人哋聽，我哋都仲係娛樂圈大佬？
作為傳媒，唔理你大唔大，最緊要係知道個信息點樣傳播俾受眾先會有共鳴，咁先會令訊息化為行動。講咗咁耐，其實有冇人睇咗個騷？