CHILL CLUB唔得
今年ViuTV《CHILL CLUB推介榜年度推介24/25》有兩個部份認真好睇。第一部分是天后陳慧琳(Kelly)出場獻出首本名曲《失憶周末》，成功炒熱全場，氣場壓過旁邊陪她唱跳的MIRROR和COLLAR，完全唔覺得佢係嘉賓，反而似主場；第二部份是日本歌手西川貴教以重量級嘉賓姿態壓軸亮相，先後唱了《Meteor》和《BEYOND THE TIME》兩首高達歌曲，用極具爆發力的嗓音令台下歌手一一變成小粉絲。
可惜，Kelly、西川貴教兩大表演好睇，不代表整場騷都辦得好好睇睇。相信好多電視機前的觀眾都是邊睇邊鬧，鬧主持之一的黃奕晨未夠淡定，鬧音響不濟，鬧歌手唔入咪，鬧直播收晒工作人員聲。而最令側目是得獎歌手領獎時，大會竟然是播預錄感言，不讓他們現場即時發言，個個上完台鞠個躬就轉頭走，令人懷疑：頒獎禮個「禮」字，其實還有沒有意思？
坐在電視機前都呻，更何況現場觀眾。臨近開場時間，大批觀眾仍然被困場外，入場前要除外套、開銀包俾人檢查，嚴到好似經過出關反恐安檢，明明早到都過去開場表演。後來保安見到人潮久久未能疏導，就直接hea check mode on，搞到成個入場流程變成笑話。
至於得獎名單亦是有趣，「年度男歌手」金銀銅由Anson Lo盧瀚霆、姜濤和Ian陳卓賢包攬，MIRROR同COLLAR亦包辦了「年度組合」金銀兩獎，男、女、組合新人金獎也是ViuTV自己人。至於兩大終極獎項——「人人樂壇年度歌曲大獎」和「人人樂壇年度歌手大獎」都是落入Anson Lo手中。難怪有聲音話，成場騷與其說是頒獎禮，不如說是ViuTV Annual Dinner。
ViuTV自己圍內人玩晒都未算最諷刺，最諷刺是之前爆出種票疑雲：有網民發現，Anson Lo支持者疑似早於官方公布售票日期前已偷步買到飛，有組織地動員親朋戚友入場投票，搞到其他粉絲都覺得冇得玩。一場頒獎禮，某些獎項鬥人氣是好合理，但有特別通道就讓粉絲霸定位，就好難講得過去。如此遊戲規則，莫講話其他粉絲，其他唱片公司都自然不想和你圍威喂。
其他公司不買帳，這個頒獎禮還繼續可以搞落去？其實都好難，而我亦收到小道消息話這個頒獎禮的確可能沒有下一次，原因正正就是ViuTV早就知道次次都是自己人攞獎，其他唱片公司已經意興闌珊。
曾經，大家對CHILL CLUB寄予厚望，覺得它可以打破壟斷，代表住音樂自由、開放平等，但今時今日淪落成公司獎，認真搞與不搞已經沒有分別，再搵幾多殿堂歌手撐場也是於事無補。節目尾聲時主持之一的駱振偉一句：「最後六個字，我哋有緣再聚」，或者已經揭示了這個頒獎禮的命運。