今次留英旅居初體驗，確實做到寓工作於娛樂，碰巧林家謙和方皓玟10月接棒式飛過來倫敦開騷；踏入11月，又輪到「試當真」3位老細：游學修、蘇致豪與許賢，連同另一位開台元老火柴仔(合稱豪腎修柴)，在英國舉行兩場「海外毛」見面會，慶祝YouTube頻道創立三周年。
完成加拿大溫哥華與多倫多兩場見面會之後，四條佬/四個仔月初抵英，上周三(11月1日)先去到毗鄰曼徹斯特Altrincham火車站附近一家香港人酒吧「夏慤 Harcourt」出席公開見面會，上周五(11月3日)再到倫敦牛津街(Oxford Street)附近的一家酒吧「Whistle Punks」舉行限定見面會──因為並非公開聚會，所以採訪期間，都要避免影相時拍到粉絲的正面──大概有廿多人參加，他們做足準備，攜帶大量珍藏赴會，包括2021年推出的《假冒女團》海報，四子當然有求必應，逐個影相和簽名，更大派從香港帶來的限量版「試當真」YES!Card。
「Whistle Punks」並非一般的酒吧，官方網站都以Activity Bars自居，大夥兒可以一邊飲酒一邊食嘢一邊傾偈一邊玩，玩甚麼？玩「飛斧」(Axe Throwing)，顧名思義，就是將整個斧頭擲向鏢靶位置，稱得上是飛鏢的變奏。
翻查資料，「現代飛斧」(Urban Axe Throwing)以及Axe-throwing Bars最早在加拿大多倫多出現，距今只有12年歷史。正正因為太新，加上佔用空間頗大，暫時未見到香港有得玩，強如鄭裕玲(Do姐)都要去到新加坡拍攝HOY TV節目《去邊啊DO姐》期間才有機會一嘗「飛斧」快感。
何解跟倫敦的「海外毛」見面要玩「飛斧」？阿修接受訪問時坦言，是公司同事強烈建議下有此決定：「因為我哋嘅同事文Sir(Harvey Man)就話：『飛斧頭好正啊～好正啊～！你哋一定要玩啊！』跟住就聽咗佢話，就過嚟(倫敦)玩囉。(問豪哥、許賢)都幾開心啊吓嘛？因為我哋啱啱玩完(擲)斧頭，希望陣間可以同大家傾下偈、影下相囉。」
的而且確，山長水遠坐飛機過來，近距離跟一班在異鄉定居的忠粉見面，玩從來不是最重要，圍爐傾偈才是。
我好奇，兩個國家，兩班粉絲，到底有沒有甚麼不同之處？阿修以肯定的語氣說有：「我哋有keep住分析㗎，我覺得加拿大啲人(粉絲)呢比起英國呢冇咁怕凍㗎，佢哋呢真係幾凍都着好薄嘅衫㗎咋。但喺英國呢，就同我哋本身香港人有啲似喇，就係我哋喺(曼城酒吧)門口影相吖嘛，咁佢哋一出嚟就話『嘩！好凍啊～好凍啊！你哋凍唔凍啊？夠唔夠衫啊？』但喺加拿大冇呢啲嘢㗎，即係阿Pody呢(曾在CapTV年代共事，現於當地定居)，係着住件恤衫加件西裝褸就(這樣)，凍到我哋呢而家鼻水停唔到，但佢係完全冇嘢。」許賢補充說：「同埋啲人普遍開心過啲香港人，即係嗰個精神面貌……即係成個人輕鬆好多……你未離開過香港，你唔知點為之『似返個人』啦，你而家就知囉，即係呢度啲人(輕)鬆好多囉我覺得，係真係冇得傾㗎。」
反而豪哥的角度比較特別，焦點不在自己的支持者，而是當地的gweilo。「我成日喺度望啲鬼佬啊，同埋啲市容啊。跟住我覺得加拿大呢普遍chill(從容)啲，但我鍾意英國啲人多啲，(因為)英國啲人黑口黑面，但係你一同佢交流呢就會搞個gag俾你，我覺得佢哋個腦成日都諗緊。」在旁的阿修笑指，豪哥在倫敦見面會前，曾嘗試在英國人面前挑戰一下英式幽默，而且事發地點竟然是廁所，「但係失敗咗嘅！」到底豪哥講甚麼？篇幅所限，無法在此透過文字詳盡交代，請留意稍後在IG公開的訪問短片，保證好笑得多。