網絡世界確實乜人都有。
上周五(8月5日)，有位聲稱「我好鍾意寫影評」的人，在自己的Facebook專頁批評《緣路山旮旯》不好看，令他「如坐針氈」，但理據基礎竟非劇本弱或演技差，而是主角岑珈其相貌平庸，更說：「想跳入個screen打×佢，想坐時光機欺凌佢，欺凌到佢大個唔敢做演員」。驚覺原來寫影評可以這樣「不講戲」、「不講理」，直接變成人身攻擊。風氣如此，固然令人「嘆為觀止」，但亦知道譁眾取寵從來有市場，該名仁兄的言論一出，立即引來網民熱議，認同好派嬲也好，帖文觸及率上升，帶挈專頁愈炒愈旺，直至「爺爺」(岑的暱稱)現真身留言：「我嘅樣衰令你難受，影響到你唔好意思，但我真係真係好鍾意做演員，就算你坐時光機返去我以前細個欺凌我，我都會想做演員」，才一下子扭轉局面，令普羅大眾不再被這種低質輿論牽着走，更成為吸引觀眾買飛入場的最強動力。截至周三(8月10日)，《緣路》累積票房衝破190萬港元，惟電影公司透露，距離「打個和」(收支平衡)尚有一段距離 ── 據黃浩然導演早前接受訪問時說，《緣路》的製作預算只有270萬港元，若要回本，票房大概需要700至800萬 ── 故現階段不能說「打勝仗」。
由汽車到主角
岑珈其戲裡跟余香凝、梁雍婷、陳漢娜、張紋嘉、蘇麗珊5位女演員有對手戲(劇本初版有9個)，更與余梁二人有親熱戲，到底當初他怎樣得到這個擔正做「山旮旯韋小寶」的機會？7月15日，亦即《緣路》上畫前約3個星期，在電影公司安排下，有機會和「爺爺」在遊艇上，一邊吹海風一邊做訪問，因為最想知，所以開首即問這一條，「爺爺」說一切緣於2018年上映的《逆向誘拐》。
「我同(《緣路》)監製Teresa(鄺珮詩，即黃浩然太太)識咗好多年，所以就識咗導演，拍咗《逆向誘拐》，當時真係客串下。因為導演好鍾意車，我又好鍾意車喎，有時都會傾下，我就成日撩下導演：『你可唔可以寫套戲俾我演呀？』導就話：『好呀，睇下有啲咩啱(適合)做啦。』(之後)導演真係有啲故仔同我傾，慢慢延伸咗呢個故事，但當時佢只係話『有個故仔啱你喎，我哋不如諗下啦，(因為角色)需要揸車嘅』，冇講實真係會搵，因為佢都知唔係咁容易，唔止開戲，係咪可以做男主角，係咪真係有投資者接受，有好多原因。」
4人成就主角之路
一段時間之後，岑珈其從導演口中得悉自己將會成為《緣路》男一，自細已渴望成為演員，如今得到這個千載難逢的演出機會，「爺爺」坦言由衷感激三個人，第一位是導演，第二位是高先電影專責海外發行的曾憲玟(Felix Tsang)，第三位是余香凝。「導演同我講：『你要多謝兩個人，一個係Felix Tsang，係佢同我講，你真係好適合做呢個角色。』因為導演當初寫呢個劇本嘅時候，係(依)照住我嚟寫，但中間(過程)有啲投資者或者合夥人會覺得：係咪可以轉人(易角)呀？佢真係做男主角？得唔得㗎？所以導演真係有搵過其他人去cast，最終傾完都係覺得搵岑珈其。」
促成「爺爺入波」的關鍵人物是余香凝。「(開戲前)導演已經預咗其中一個女主角係Jennifer，而佢同導演傾嘅時候，係好強烈同導演講(建議)：『你真係搵岑珈其啦，佢真係好啱做，佢真係可以！』而我同Jennifer又真係好有火花，我自己都覺得，同佢拍得最舒服，最有默契，所以好多謝佢。」我問「爺爺」，到底他們說的「適合」是甚麼意思，他說：「因為(阿厚)呢個男仔，外形唔討好，係個典型好普通嘅男仔，四周圍都會出現，你見到佢個樣唔會話：好靚仔呀，如果係好靚仔嘅，都唔使媾女啦，(對方)都已經被迷倒。另一樣嘢，導演當時都有話，因為故事入面，阿厚要去唔同地方送女仔返屋企，所以佢要有車牌，又真係咁啱我有棍波車牌。」
今年32歲的「爺爺」說，當年滿18歲之後，已立即報名學車，「一來我好鍾意車，二來阿媽話有車牌傍身，有咩事做嘢都方便啲，加上我爸爸以前係貨車司機，我成日都會坐佢架車，覺得揸車好得意，同埋『好係爸爸』(父親身份投射)。所以一到18歲，就立即去考車牌，係棍波車牌。」所以話說回來，除了上述提及的三個人外，其實尚有第四個人促使岑珈其當上《緣路》男主角；對他而言，這大概是父親送給自己最厚重的禮物。