《黑白大廚：料理階級大戰》的兩位主持白種元(左)及安成宰。
Netflix的韓國真人騷認真掂，之前睇兩輯《體能之巔：百人大挑戰》已經歎為觀止，一班大隻仔女在各項競技裡面展現力量和速度，就算未撻着你入gym room操肌的衝動，都足夠令你睇到熱血沸騰。可是，高處真的未算高，上月中旬上架的《黑白大廚：料理階級大戰》真心是另一個層次。
《黑白大廚》齋睇卡士就知道有幾勁，首先兩位評判都是響噹噹的大人物，一位是企業家、美食家、廚師及主持集一身的白種元；一位是韓國唯一米芝蓮三星餐廳Mosu的經營者兼主廚安成宰。而參賽廚師亦犀利，除有80位隱藏在民間的「黑湯匙」廚師，還有20位業界知名的「白湯匙」明星級廚師。當中包括白宮國賓晚宴主廚Edward Lee，韓版《MasterChef》第二輯冠軍崔康祿，「國際中餐大師」呂敬來，以及多位米芝蓮星級主廚，這個陣容簡直是有今生冇來世！
當然，有卡士不等於好睇，大把電影有無敵陣容照樣不堪入目。但今次《黑白大廚》卻是有卡士先夠刺激，因為節目安排了「黑湯匙」和「白湯匙」兩批地位懸殊的廚師正面交鋒！不要以為那些經驗老到、譽滿天下的名廚sure win，節目中不乏後起之秀盲拳打死老師傅的例子，有些敗於題材離開自己專長太遠，更有些衰在團隊戰，與其他「白湯匙」產生不到協同作用，大師全力以赴都會隨時輸。這份命懸一線的感覺，不是一般真人騷能夠睇到。
另外，節目裡面各回合玩法亦非常多變，由百人票數揀最合口味餐點，到限時開餐廳鬥高營業額，不單止考廚藝，仲要你識得食腦、變通，以致幾微小的決定都極為重要，參賽者往往一子錯便滿盤皆落索，觀眾都不期然戥他們緊張。
可能你會諗，「唓，吹到咁大，烹飪比賽節目咋嘛，香港一年都有好多套啦」。的確，本地電視台都製作過不少類似節目，TVB今年都有方力申、黃翠如主持的《拍檔廚房》，以及薛家燕、冼靖峰等主持的《家常便飯爭霸戰》，但明顯是另一回事，《黑白大廚》製作費肯定高好多，既請到一班願玩服輸的名廚落場，又搭建出一個又一個令人睇到「嘩」一聲的場景(整間便利店搬入攝影廠最令人印象深刻)，實在不應拿來直接比較。
但如果你因為這樣，就話香港肯定拍不出這個level，我不認同，香港明明只是彈丸之地，卻有幾十間米芝蓮星級餐廳，其中更有七間摘下三粒星，而另一知名排行榜「世界50最佳餐廳」本年度都有兩間餐廳入圍，實在是夠名廚有凸，而且本地製作班底一向高質，絕對有能力、有技術去拍，只是一眾老闆做慣平時那些小型製作，懶得挑戰新東西，又誤以為市場細冇肉食(明明傾得成內地合作就大把世界)，所以一切都不是不能，而是不為。