為犬兒去聽一個考評局主辦的DSE講座，發現大部分參加者像我，屬於家長身份，適齡考生倒寥寥可數。相傳父母幫埋兒女大學畢業搵工、搵到工仲要偶爾代致電其公司告假，你緊張過佢，恐怕是真的。
抵達現場，先被大會攝影師拍攝簽到，繼而收到問卷請填，坐低便觀看上屆同類活動情況，片段中家長們交口稱譽云云。於是我明白，兼任免費臨記，下年輪到我出現於新片段；同時我明白，點解主持成日提及考評並非政府部門，財政獨立，講求經濟效益，谷谷宣傳。
抵讚的是，短短開場白後，直接進入答問環節，絕少廢話，家長們問得好in，嘉賓答得具體，我幾乎跟不上。往來無白丁，便不作空泛之談了──對，又係家長關心囉。
那麼，我藐嗎？非也非也，《孫子兵法》曰：「多算勝，少算勝。」市道如此，唔跟就笨，孩子未知艱難，爸爸來。奢言放任自然的父母，一係為偷懶找藉口，一係放煙幕想對手放軟手腳，正如狀元總說唔多溫書，兵不厭詐也。
非常時期，家長更非要介入不可。很多學校已經講明，罷課或拉人鏈要交家長信，你又由孩子決定？計我話，寫定封贊成信打打底，則貴子弟罰都無咁重。學校怕負責任，家長負。
回頭說那場講座，結果聽唔晒，因為當日封了觀塘線，預時間鬆人。亂世，怎能不兩手準備？