師奶追捧靚仔豬肉佬，湧去入貨，算不算虛火？男歡女愛也屬一種供求效應，自己條件差總期望對方條件好，於是久久未能匹配。講到街市，明買明賣，可以要求最好的，檔主豈敢挑剔顧客醜樣？夠錢幫襯就得。個別師奶冧某豬肉佬叫有路，集體冧便叫粉絲，沒道德包袱呀。推而廣之，MIRROR何嘗不是？扒女意淫教主，教主永不拒絕你，永不笑你扒。反過來，拍拖結婚講互相照顧，當你實在沒空去應援，教主不怪你(根本沒留意)，輕輕鬆鬆。追星比拍拖結婚抵玩。
嫌始終難見到真人，見到真人尚嫌與群眾爭崩頭攤薄晒，所以男性近年愛公交──反正公共交通，嘟一嘟隨時任坐任摸，而且不愁不能獨佔，愈share愈熱鬧，故曰公交迷。香港公交迷特別雜食，巴士線執笠關佢事，鐵路開通亦關佢事，若訴諸懷舊，怎麼又貪新？鏡頭所見同一班宅男，宅男就是社交能力偏低，適合公交，再豁達的真人偶爾亦會擺臭臉吧，公交不會。
為何多數只見男迷公交？香車美人，女士想有部私家車接送還來不及，逼巴士逼港鐵逼不得已，仲好意思張揚？所以，難怪宅男溝唔到女，借公交宣洩。
此外我想講，對於每天睡眼惺忪趕上班筋疲力盡返屋企的吾輩打工仔，失驚無神衝入一批打卡黨，日日都話大日子，吵吵鬧鬧嚇餐死，阻塞通道，心很累。
[email protected] 逢星期五刊登
