《祓魔》選角解謎

此文見報當晚(2月28日)，共二十集的ViuTV原創劇《弊傢伙！我要去祓魔》(簡稱《祓魔》)已播到第十五集，換言之下星期就是結局篇。網上有關這套劇的討論多不勝數，我亦有很多未解之疑，因此繼上一篇故事拆解後，過去幾天繼續向此劇的靈魂人物戚家基(Peter)打爛沙盤璺到㞘，難得他耐心解答，決定今個星期再寫一篇，重點有二：風格上的轉變以及選角考量。

Peter對上一齣作品，已是2020年10月在ViuTV推出的《暖男爸爸》(簡稱《暖男》)，是主打溫情滿溢的輕鬆小品。五年後《祓魔》問世，縱然保留溫情與愛情元素，譬如端木零(岑樂怡)一直憶念在她13歲時因車禍離世的母親端木圓(余曉彤)；毛無邪(強尼)與前妻阿遊(張紋嘉)藕斷絲連；萬無極(朱栢謙)與唐馨(韋羅莎)23年夫妻關係貌合神離；御前鐵馬(柯煒林)「癡漢式單戀」路嘉敏(王頌茵)等。此外尚有二次元、玄學術數、超自然力量、宗教信仰、日本鬼神文化等等，包羅萬有卻天馬行空，奇幻色彩濃厚。而且以小見大，故事核心不僅圍繞幾個人、幾個家庭，是講一座城市，甚至整個世界，跟《暖男爸爸》差異很大。

何以變化如此大？全因Peter是個資深動漫迷，尤其鍾愛荒川弘的《鋼之鍊金術師》，近年則有追看山田鐘人原作、阿部司作畫的《葬送的芙莉蓮》，朱栢謙本身是蚵仔煎(ゆでたまご)《筋肉人》的超級粉絲，他曾如此形容導演：「佢涉獵嘅係所有動漫，尤其是日本嘅動漫……佢係一個字典嚟，我講咩佢都答到㗎！」

事實上當年Peter創作《暖男》劇本、設定林世榮(鄭中基)的性格時已沒有隱藏這一點：他極之喜歡高達模型，而且是「自護軍」(馬沙)那邊的粉絲，太太余超瓊(余香凝)會買兩盒沙薩比(Sazabi)RG模型給他作為生日禮物，她更向Lantau(強尼)說：「男人玩高達，女人唔明白！」所以構思《祓魔》絕對是意料之內，Peter也毫不諱言「想搞呢啲嘢好耐㗎喇！」

希望突破香港影視題材的悶局，是促成Peter創作《祓魔》的另一個原因：「拍完《暖男》人人都話開續集，實掂，我就覺得好悶。」最初的構思是「晚吹宇宙」，所以《祓魔》原先的劇名叫《總有一瓣》，呼應逢周五晚播出，潘紹聰、岑樂怡與詹朗林主持的《總有一瓣喺左近》。「我當時嘅想像就係《晚吹》每個節目都可以由talk show另外再生一個劇出嚟……然後呢幾個劇仲可以crossover，即係最尾好似《復仇者聯盟》咁樣，當時第一個我想做嘅就係《總有一瓣》，就係講鬼啊呢啲咁嘅嘢。個劇開始咗(拍)之後呢就有人話：你個talk show同劇都係叫《總有一瓣》，之後啲hashtag點啊？啲人講起就會撈亂，所以都係改另外一個名好啲。」

《暖男》於2020年11月播畢後，Peter隨即向ViuTV提出製作《總有一瓣》(後易名《祓魔》)。翌年5月完成故事大綱及首集劇本，2022年4月寫好分集大綱，當時劇中角色已大致確定。全劇約有四十多位演員，規模與《暖男》相若，分別在於《祓魔》沒有像鄭中基和張可頤那種級數的巨星，悉數由ViuTV旗下合約藝人和與ViuTV長期合作的演員參與，包括早期已落實的「三人組」，以及朱栢謙、柯煒林、曾贊學、米露迪、黃奕晨、吳肇軒、黃溢濠、張紋嘉、徐㴓喬和邱頌偉等等。「當時我覺得其實ViuTV已經可以冇需要靠外援，可以自己捧自己演員，佢哋入面仲有好多可以演到戲嘅人。」

「三人組」之中，Peter說毛無邪是為強尼度身訂造的角色：「《假設性無罪》同埋《暖男爸爸》入面，佢個角色都係表面好似有啲蠱蠱惑惑，但又做到一啲深情，或者比較認真嘅戲，人生各種甜酸苦辣佢都好多經歷過。毛無邪以前係一個金牌風水師，到後尾俾人ban咗，又冇晒靈力，要呃飯食，我由諗到呢個角色開始，就係往(搵)強尼(演)嗰個方向諗」。

而岑樂怡(阿妹)與王頌茵(Kathy仔)組成「零敏CP」緣3於三個巧合。首先，除了「老臣子」阿妹，Kathy仔亦曾於2018年主持過第二季《總有一瓣喺左近》。其次，她倆同為《暖男爸爸》的演員，分別飾演暴龍哥的班主任Carmen和保險從業員Queenie，惟因篇幅所限令戲份大幅刪減，Peter認為「有負雙姝」。最後，二人的真實性格跟角色相近，這點來自Peter在《暖男》拍攝現場的觀察。「阿妹有一啲端木零嘅屬性，佢會攞個飯自己坐埋一邊食，其他人打牙骹佢唔參與嘅；Kathy仔識閱讀空氣嘅屬性，我覺得似路嘉敏，佢好識趣嘅，佢拍緊劇嘅時候見人搬嘢，佢就知道人哋就嚟要郁佢坐梗嗰張凳，咁佢自己會企定起身先。」

當然也有些觀眾覺得似曾相識，卻霎時間說不出其名字的「新鮮面口」，Peter說：「我自己喺唔同地方睇過佢哋演出，到我自己有機會拍戲，就會盡量希望佢哋參與。」他特別提到林子傑(潮來近江)、莊韻澄(陳丹心)與冼康正(辟邪隊隊員)：「林子傑同莊韻澄都非常好，講真如果唔係佢哋兩個咁樣嘅演出，『玄門正宗』我哋靠嗰一個半個人，係冇辦法做得出嗰種壓迫力，或者嗰種有少少陰陰哋，但表面上睇唔出嘅感覺。冼康正都好impressive，佢個角色老實講冇咩戲做，對白一句起兩句止，但係佢做得好認真同埋投入，真係做得到辟邪隊需要嘅嗰種mode。」