麥太：唔該，我要一個常餐吖，常餐有咩食㗎？
伙記：常餐咪同特餐一樣囉！
麥太：咁特餐係咩嚟㗎？
伙記：咪同快餐咁上下囉……
繼士多啤梨蘋果橙，阿媽，我呢個星期都好亂啊！
除咗早午晚餐加每日例湯，「常、特、快」已經係今日「茶餐廳」嘅標記，而呢三個字無論係細路年輕大人，拍拖吹水甚或社團大佬，從奶茶鴛鴦豆冰西多菠蘿油，都可以搵到無數港人軌跡踪影。
昔日之始於茶啡
香港早期華洋雜處，飲食習慣慢慢受西方文化影響。昔日街頭巷尾，坊間有分茶啡檔同埋冰室，高級啲就叫餐室，檔次再高檔啲先叫餐廳，可能牌照所限，賣嘅品種各有不同界線；茶啡檔真的只賣奶茶咖啡(如至今仍「保存」早期發跡茶啡檔嘅中環「蘭芳園」），其大部分顧客為勞工階層；冰室則為追求時髦嘅年輕街坊，分別就係因為有售當年潮品雪糕，或紅綠荳冰及多士蛋撻麵包；而餐室才賣AB快餐全餐或飯麵等等。
當中於1950年代開業，位於油麻地廟街與眾坊街之間嘅美都餐室，位處最地道嘅位置、最地道嘅文化景點；雖然物是人非，不過餐室從外到內的一樑一柱一磚一石，或是傢俬裝潢散發嘅色彩，仍保留那種「懷舊」美感。難怪一些港產片如《九龍冰室》、《PTU》及《星月童話》等等，都以美都作為取景之選。
今日之慣於茶餐
昔日美都一眾茶記食客，多是附近左鄰右里街坊生意，香港人除咗要趕上班食個早餐，或閒時飲杯咖啡嘆個西多士，都係上落十零廿蚊生意；舊時一日辛勞收工之後，大部分都只會習慣趕回家中，同枱食飯增進感情。但隨時日更替衍生混合發展，今天香港區區有遊客影響之下，茶餐廳賣嘅再不單是平價「輕食」，而美都餐室若以價錢衡量，亦已經「跳級」不再平民；當然若以「Feel」為賣點，坐在二樓「雅座」，唔介意與拖喼為伴，隔住窗花望住不再熱鬧嘅榕樹頭公園，襯住西多或菠蘿油加奶茶咖啡，仍可以「品嘗」到那份僅餘街坊五、六十年代情懷。
他日之念於茶味
一個文化必然由一個社會群體，經歷一個集體行為催生而成，由價廉物美街坊生意，到今天「茶餐廳」呢個產業可香港交易所上市，就知道今日茶記文化已深於酒樓，總有一間喺左近；賣嘅亦唔止「AB常特快」，中英美日意法(西多原為法蘭西多士)連燒味飯雲吞麵西冷鐵板都有。兼且不分晝夜無定季節廿四小時，就連移民外地衣食無憂仍念念不忘呢份香港先有嘅「精神」！
浪漫到陽光穿透窗邊久違嘅百頁簾，或入夜霓虹襯住廟街，其實除咗美都餐室，香港今天還有不少比美都「豆泥」嘅舊式茶記。那份簡樸基層貼地味道，享受仍然一份街坊人情。食得寫意舒服，除咗環境、食物，仲要有一份經歷過嘅成長心境。