本報財經版有唔少高手專欄講市論股，本來我都唔係呢瓣。但係，響外國，政治都可以用數據來分析，真係好似睇股市一樣，目的就係要預計民意代表之輿情走勢。
其中一個工具就係睇民調。民調數字係滯後嘅，所以響公布嗰陣，未必可以反映嗰位民意代表當下嘅支持度。但點都好，所謂鑑古知今，都可以有助依家嘅朋友，去睇下民意領袖之走勢，作一個未來發展之分析。
呢幾日我就研究咗，好打得領袖之民望數字，都有啲驚訝。因為佢響薄扶林大學民調中心公布出嚟之支持率，由上一次嘅51%，跌咗6個百分點，跌到有調查以來之低點，即係45%。一次過跌6個百分點，點解有些少跌眼鏡呢？因為香江市民，大抵對政治領袖都幾寬容，過往經驗睇到，香江最高領袖如果出現咗跌勢之後，會係約兩個百分點咁樣慢慢拾級而下。一次過碌走咗6個百分點，都幾意外。上一次睇到咁樣，都係上屆民意領袖之時，當時佢贏咗之後，原本民望都升過50%，點知因為僭建被揭發之後，即刻懸崖式下跌十個百分點。而今次好打得領袖一次過碌走六個百分點，原因似乎受到僭建律政一姐的拖累。
香江最高領袖的民調走勢有個特色，就係一浪低過一浪咁樣碌落去，直至碌到一個基本支持盤，大概係18%至22%嘅區間就停咗。呢個位，歷屆如是，應是最基本之死忠支持者，相信呢班人都唔會係飯民支持者啦，都應該係建制嘅死忠之士。從呢個角度講，香江領袖可以捱幾耐，就好視乎佢響就任到邊個時候，會碌到呢個支持位。
老董響連任後第一至第二年開始，已經一步一步咁樣走到呢個地步。至於上屆嗰個，去到第二年開始，個勢係向嗰邊行過去。
按呢個思路，如果好打得真係識得玩，能夠響五年內，唔會碌得咁快咁急的話，都應該要穩住響35%至40%嘅區間，勉強用老董之先例，有機會再搏多五年。但係，如果按上屆咁樣，日日與不同人挑機，就比較麻煩。因為按一浪低過一浪之形態，如果民調之下降軌真係形成咗的話，就真係幾頭痕。個形態係點呢？用文字係咁樣解：即係第一次民調碌兩個百分點，第二之民調又碌兩個百分點，第三個民調碌三個百分點，第四次民調好多時會回一回，上升番兩至三個百分點。但呢個循環，就即係響兩個月之間，佢嘅支持率就冇咗四個百分點。當然，上述都係一個目測觀察，唔係真係咁科學化（照理應該整個數學模型嘅），而且由於今次45%跌穿咗對上一次低位47%，係有些少隱憂㗎。但係，現時好打得嘅下降軌應未形成，要睇多兩至三次至可以確定。（記住，以上純屬吹水，毫不科學！）