疫症搞成點？我估除了幾個地方例如香江呀，濠江呀，台灣呀咁樣，先至有能力講抗疫有成效，其他真係一團糟。有些中美洲小國，基本上唔能夠長期鎖國，唯有局部鎖國，結果疫情不可收拾。睇下巴基斯坦就知乜嘢事。
於是全球慢慢走向幾個月前英國醫療專家講嘅herd immunity，即係集體感染之後就集體免疫。咁好唔好？梗係唔好啦，會死多幾十萬以至幾百萬人，一定唔掂。但係，長期封關又會攬炒經濟，封關都會出現經濟下滑以至醫療體系崩潰，究竟點搞呢？
最好嘅方法，就係將病毒散播嘅責任，推晒俾北方大國。美帝侵侵當然係箇中能手。依家侵侵民調麻麻，加上疫情仲係緊張，佢面對上任以來最大嘅管治難題。唯一有方法去增加勝算，就係要將疫情同經濟脫鈎，將疫情吹到有咁細得咁細，然後大大力加大經濟反彈力度。佢嘅如意算盤係，疫情差，經濟好，連任有著數。疫情差嘅責任，一定係響北方大國。
咁點解北方大國咁邪惡？因為侵侵話，佢地唔單只四圍散播病毒，仲要四圍打壓異見者，當然包埋香江。由於係咁，侵侵就要制裁香江，要北方大國為此付上代價。從呢個角度講，侵侵唔會好理國安法技術細節。因為侵侵政府覺得，一旦北方大國搞國安法，就係要進一步打擊香江嘅人權，無論將來係加辣版定係減辣版，總之北方大國做初一，侵侵就做十五。依家美帝國務卿老蓬仲要加多一樣，就係九月立法會選舉。又係咁樣，北方大國響選舉方面做乜嘢手腳，美帝就會還拖。咁樣局勢會維持幾耐？唔知㗎。總之依家大人打架，唔係好關細路事。
面對疫情，英帝波叔響疫情去到依家有下降軌之後，終於都要開反副經濟引擎。同侵侵一樣，疫情響英帝咁嚴峻，一定唔關佢事。英帝做事素來狡猾，點會兜口兜面一巴一巴咁樣去打北方大國？佢地做事就俾大家感覺，全球處理疫情不力，罪在北方大國。而且北方大國咁樣搞香江，波叔就送BNO家庭去英帝避風頭。呢一招絕矣。波叔正值脫歐之後，英帝面對好大嘅錢荒同人才荒，響香江挖走一堆人都係好事，至少佢地都會帶錢買樓，有家室嘅仲要供養細路到大學，而且香江人點會響英帝地頭搞事？
高雄市長補選展開，English Choi派咗陳其邁出陣。至於藍營就忽然響市議會裡面搵個青年議員去打一次，真係好有輸嘅決心，仲有一個係民眾黨(即係台北市長柯P嘅政黨)嘅參選人，睇來都係柯P要去馬，試下高雄可唔可以有柯P式突圍。陳其邁贏面大。至於新加坡，李光耀下一代兄弟大鬥法，李顯龍vs李顯揚，人民行動黨有冇暗湧呢？其實要人民行動黨輸國會選舉，難過太陽從西邊升起。
倫敦大學亞非研究學院法律系博士