大病剛愈。美帝侵侵對中施壓，無減弱跡象。八月十五日，本是美中第一階段貿談之中期會議，雙方事前出奇地低調。之前，筆者與老友A閒談時戲言，睇來都開唔成。本是戲言，卻言中，查實乃本人直覺，衝口而出，無理性可言。主因係，如果八月十五日是重要會面，雙方定必大鑼大鼓製造良好氣氛，但會前無風聲，肥蓬更出遊東歐，唔似有大事發生。有通訊社話，北方大國因有北大海會議而取消，但侵侵早前話，係佢主動提出唔開。信邊個？係未雙方都未ready？
上周美帝民主黨開黨代表大會，拜登上場，極左失望。佢地政綱，唔再講一個中國政策，而且更直接話要貫徹執行香港民主及人權法。當然，政綱好多時都係選舉時候用，選完忘記晒。不過民主黨會唔會上台後就大改對北方大國嘅態度？未必囉。拜登有冇暗湧？都有。黨內極左力量雖然依家眾口一詞支持拜登(都係俾面派對)，遲下會唔會有聲音覺得拜登太右，然後又叫選民唔好支持拜登呢？唔知了。
香江問題都惡搞。民主派係唔係要總辭，真係嘈歸嘈，始終都係要搵一個機制處理。以前呢？民主派有一班可以服眾嘅大佬級人士如華叔，一錘定音，好多雜音唔會再出現。加上，有一些學者、時事KOL帶動風向，咁就好快形成了一個社會「共識」。但今時唔同往日矣。一方面，德高望重嘅民主派老前輩，依家已經失去了統合聲音嘅能力。另一方面，KOL帶風向，以及學者的聲音，已經唔可以似以前咁樣形成社會主流。
冇計啦，依家運動係去中心化，你不服我，我不服你，而且成個社會充斥著懷疑論，覺得身邊嘅同路人，未必信得過。既然係咁，響今次去或留嘅事，最好就係交俾選民決定。嗱，呢個做法，台灣藍綠陣營，都有一個類似嘅機制，處理多人出選一區嘅參選爭拗。咁究竟個機制係點？會有乜後果呢？
例如利用選前民調，以及用選民公民投票，再加埋現任立法會議員(包埋初選出線嘅人)，三方來形成一個決策機制，咁就似比較貼近民意。日後去或留呢？都可以出師有名啦。咁呢個機制如果能夠成功確立，日後就有一個機制處理爭拗了。老實，依家仲用民主派前輩＋學者意見＋KOL幫手推動一個主流睇法嘅做法，已經out了。
香江政治立立亂，會唔會嚇死投資者來香江呢？老友A話，外資雖然未走晒，但大家都心中有數。國安法又拉人，拉幾個人又入報館搜查，外資真係好驚嚇，認定香港一來已經難搵錢，二來冇晒自由，警察可以隨便做事，無晒自由保障，佢地驚唔知幾時，會有人上門拉人封艇。
外資要走，唔會高調大聲講，而係一步一步做，問你怕未？