身體機能唔好，入院大修，所以見唔到大家。現在家靜養。日頭瞓得太多，夜晚就好精神，依家變咗英美時間作息，同大家調轉晒。
美帝每個星期都有料到。我一直講decoupling，即係脫鈎，唔係講玩，而係有加速嘅勢頭。上周仲係講緊係未要制裁香港官員，而且仲要講到似層層。老實，美帝唔需要正式制裁，只要打下眼色，話有機會制裁邊幾個，銀行家就會識做。如果我係銀行佬，就會整個表，將呢班有機會被制裁的人士放入高危行列。唔係話唔俾佢地用銀行服務，而係要睇實佢地一舉一動。萬一美帝把刀劈落來，就可以即刻拉閘。咁嗰個名單，就會包埋佢仔女近親。有乜後果？你覺得銀行會唔會因為要你呢位咁高危嘅客戶，而累到俾美帝監管機構罰十幾億？
Decoupling響本周就加速中。北方大國一直講，美帝冇晒對話渠道，初頭聽落有啲奇怪，冇理由兩個大國冇晒接觸。睇真啲，唔係冇晒接觸，而係北方大國覺得美帝唔係用對等嘅方式處理事務。睇返美帝嘅要求，只有一樣：behavioural change，即係行為的轉變。用我地市井嘅講法，就係要「轉軚」。咁真係冇理由，美帝叫你轉右，你就轉右，美帝叫你轉左，你就轉左，如果係咁樣，仲有國家尊嚴呢？呢樣就係霸權。國與國本來係對等㗎嘛，你叫我就要做，我唔願意就畀你打，係未強盜邏輯先？
問題係，即使國際關係有唔同嘅理論學派，但去到依家呢個時勢，理論已經冇晒意義，只係剩低叢林法則。直到今日，香江仲有一堆評論員，仲響度話，美帝響北方大國好多利益，唔敢大手打落去，又話美帝響香江好多利益，唔會搞垮香江，因為咁樣會自傷三千云云。如果三年前你信呢套理論，三年後嘅今日，點解美帝仲要招招狠辣咁樣殺埋嚟？英帝開埋度門叫你走，就係知道美帝不是鬧著玩的，依家就俾個逃生門畀你。如果真係利益至上，英帝就唔會左封「威威」唔俾佢搞5G，右封核電計劃啦。英帝係全球最務實最利益至上最冇原則嘅國家，連佢都咁樣做，你估講玩咩？
下一步點觀察？當然第一，每晚八點後，準時睇美帝肥蓬的推特，追蹤佢最新動向。執筆之時，佢去完丹麥，睇個勢，肥蓬係要撬鬆歐洲，拆散德國默姨主導嘅溫和對中立場。第二，就唔該得閒扭去睇下有關軍方報道嘅頻道，特別要注意南海事務，嗰邊依家軍艦仲多過貨船，軍人打卡多過食飯，仲有就係台海嘅軍事行動啦。最後就係要睇下美帝響趕走領事館之後，會唔會再關多幾間，仲有就係會唔會有招數，處理響美帝國土內嘅所謂「間諜」，即係會唔會高調捉幾個人祭旗。我亦都會注意，呢兩周會唔會有官員或者有相關制裁。
倫敦大學亞非研究學院法律系博士