啟德體育城存廢事件，峰迴路轉，搞到政府要同體育界人士、地區議員兼立法會議員幾乎陷於開火邊緣，最終政府收回成命，平息一場政治風波。至於嗰位周圍鼓吹拆卸體育城，素有「影子土地開發及房屋局長」的一位梁粉(因為佢講嘢之份量，隨時勁過板間波同張教授)，今次真係老貓燒鬚。
有人話，今次係一次梁粉冒進主義的例子。我就覺得唔係，反而係梁粉被人整蠱嘅又一例子。呢件事，當堂令我想起2000年，台灣核四事件呢件舊事。
話說2000年，陳水扁上台之後，其中一個重中之重嘅政策，就係停建核四。停止核電，建設無核家園，係一條總路線， 邊個阻止佢停建核四，邊個就要讓路！
當時行政院長係國民黨嘅唐飛。一日，佢突然收到阿扁之「柯打」，要停建核四，頭痕也。
事關核四電廠，仲係爛地一片，規劃咗十幾年，好辛苦至響上屆政府埋尾。電廠背後，有千絲萬縷的金權關係，大部分都係同國民黨好friend之政經人士。查實，嗰陣部分政界人士，雖然係國民黨人，但都支持阿扁，因為一來，佢地響國民黨裡面，不受重用，二來部分亦想借支持阿扁，換取阿扁繼續維持佢地之商業利益，包括核四。
但係阿扁叫唐飛宣布停建核四，咪即係要佢同呢班忽然撑扁之國民黨人開火？但係，對唐飛而言，唔公開宣示停建核四，就會得罪阿扁，做唔到阿扁嘅要求，亦恐怕立即下台。
唐飛想到一個辦法。首先，佢響行政院會議上，公布話有意停建核四。佢講完，嗰班國民黨友嘈到拆天，拍枱拍桌反對，猛話諮詢咗十幾勻，做咗咁多次規劃，點可以話停就停？
然後，當然有班阿扁親信響會議上據理力爭啦。唐飛身邊有一些「扁粉」(支持阿扁之深綠人士)亦有出聲爭論，話核四搬去外島一樣得。最後兩派當然吵到飛起，嗰日會議不歡而散。
「扁粉」當然憤憤不平，同唐飛嘈啦。唐飛就一副無奈表情，仲暗示「扁粉」可以鼓勵支持者，響傳媒大講停建核四，引起社會討論，利用民意反撲班國民黨人士。扁粉心神領會啦，於是就有一個叫柯建銘嘅人，日日上電視電台大講要停建核四。此舉激到先頭講果班國民黨人非常不滿，正所謂你做初一，我做十五。你識吹水，我識上街也！
當時唐飛之算盤係，假如扁粉贏咗民意，停建核四，佢響總統面前可以攞威抽水，而佢又可以響國民黨人士面前作狀扮無奈。如果扁粉輸咗，佢一樣可以話，政策有延續性，牽一髮動全身，都係唔好停建。咁樣，佢可以卸責話，扁粉太冒進，搞亂檔，功敗垂成。如果呢個算盤打得響，無論停唔停建，贏家都係唐飛！(二之一)