雜誌封面，最好的題材就是江湖八卦，黑幫廝殺，恩怨情仇。(資料圖片)
做雜誌，拼封面，最好的題材就是江湖八卦，黑幫廝殺，恩怨情仇。
在做週刊雜誌時，經常會有一些讀者會，從中聽取意見，其中最賣座的就是警匪故事和幫會恩怨。
爆得料多當然有手尾跟，在業內經常發生很多不愉快事件，都係被人哋尋仇。黑社會唔會畀律師信告你，只會斬你。
正所謂食得鹹魚抵得渴，做得呢啲新聞你都預咗有手尾，當事人都要有所防備，曾經亦都有些黑社會「登門造訪」，所以雜誌嘅保安都比較嚴密，但總有百密一疏，而且拳頭在近官府在遠，我張書枱下邊就放咗一把牛肉刀，以作不時之需，危急時都可以擋兩下吖。
嗰陣時我哋有個行家也是做警探線的，他自己開設了一間警備用品店，有避彈衣同防斬背心，我也備了一件，類似古代的鎖子甲，貼身穿的。
唉，寫幾隻字嗻，搞到要擔驚受怕，枱面放支筆台底放把刀，真係好諷刺。
講返一件陳年舊事，事情牽涉到香港14k九江街一名超級大哥劉安，人稱劉五億或者劉十億，依位大佬點起家相信好多人都知，呢度就唔講喇，至於點解將佢擺咗上枱做咗封面故事呢
源於1999年當時劉安主打倫敦金賺到盆滿缽滿，N周刊派咗個記者臥底去面試倫敦金公司當僱員深入挖料，之後一五一十寫哂出嚟，因為幕後大佬就係劉安，所以將佢嘅傳奇故事同如何經營非法倫敦金搬咗上封面。
由於N周刋當年的影響力也相當大，故事曝光後警方亦都相應採取左行動，劉安都要避咗一陣鋒頭。
冤家路窄，時值2000年，N週刊跑到臺灣開壇，我亦被委派到當地培訓一些臺灣的新員工，當時任職時事爆料組的資深記者，大多是從中國時報週刊那邊挖角過來的，其中一位資深女記者的親屬，是當時臺北刑警的大隊長，在她的牽頭下約了一次晚飯局。
萬萬想不到的事發生了。
宴會上除了刑警大隊長，還有兩名男子在席上，經介紹其中一位是鄧麗君的三哥，我當然客氣一番上前握個手。
而另一位赫然是香港的超級江湖大佬劉安，雖然心中一顫，但仍禮貌地上前行了個握手禮。
心想刑警大隊長在，不會拿我怎麼樣吧？
經介紹，劉安知道了我的身份，它的目光也不時的掃向我，我心知肚明，但退無可退。
果然酒過三巡，他拉了我一旁跟我說悄悄話，問我倫敦金的事是甚麼人爆料的？
我還記得是這樣說的：安哥，邊個爆我真係唔可以話畀你聽，因爲我哋要保護我哋嘅新聞來源。其實最緊要嘅係我哋寫嘅內容係咪真實嘅，有冇生安白做，屈咗你？
佢話冇啊，都好清楚啊。
見佢都幾有大佬風度，我就講多兩句，安哥，其實做每一個行業，都有佢哋嘅天職嘅，好似差人去拉賊，古惑仔去劈友，我哋做傳媒，揸筆爆料寫嘢，總之寫嘅係事實，冇屈人，就唔好怪我哋。
可幸劉安也是說理之人，此事也作了個了斷，劉安其後也因病逝世終年58歲。