面書嘅廣告系統真係好犀利。好多朋友同我講，面書成日見到移民廣告。但係我都冇睇過移民公司嘅資料，點解又係咁呢？似乎係Talk of the town，咁面書就推俾你啦。
自從英帝波叔提過會俾轉變國籍嘅機會俾香港人之後，大家都搲爆頭，點解佢地忽然咁好人啦？其實英帝國勢麻麻，但係總有老本在身。呢啲唔係佢地嘅乜嘢制度呀，法治呀之類，而係佢地本護照。點解外邊嘅人，咁鍾意呢本嘢？單係去美帝唔使簽證，去歐洲(以前)，唔使工作簽證，咁就好抵玩。
依家去歐盟，英帝響下年就要全面邊境檢查，咁就麻煩好多，無咁便利。即使係咁，如果決心要離開，呢本護照都有用嘅。老實，脫歐之後，英帝覺得自己有返邊界管制嘅權力，但歐洲啲廉價勞工就大件事，無得去英帝做嘢。呢度其實唔止基層工作，即係裝修水喉電工，連一啲專業些少嘅支援性人員都唔得，例如英帝好缺嘅醫療員工。咁英帝有咗邊境權，但就冇咗廉價勞工。咁響海外搵返啲有錢同埋聽話嘅前殖民地子民，冇問題啦？
好多國家都明白呢個道理。唔係話佢地唔想香港衰，只係自己經濟唔好，現成有一班相對有錢嘅人，點解唔搵。English Choi當然會幫一班「流亡」人士，但係佢哋一樣要吸收一班人過去。楓葉國同埋袋鼠國都係有呢類想法。例如俾當地香港留學生可以留低做嘢換國籍，咁就無端白事有一堆屋企比較有錢嘅青年留低，佢哋家人其後都可以去楓葉國同埋袋鼠國做家庭團聚，一樣會帶走一大堆錢去楓葉國袋鼠國啦。
因為咁樣，連太陽國都心思思。香江人好鍾意去太陽國旅行，但當地好多人話你知，去太陽國做嘢，人工唔高，但東京生活費好貴。但係咁樣，最大問題仲係語言。大佬呀，十幾歲去讀日文，同一個四、五十歲嘅去讀五十音，時間同效果差好遠也。依家去日帝做「高度人才移民」，要計分㗎，語文都佔咗8分，N1呀大佬，你估睇動作片學日文咩？任何高度人才見到要N1，即刻彈開啦。太陽國都睇到呢個要求，其實冇理由叫申請者先讀好日文至去日本做嘢，形同趕客。咁佢地會唔會郁下呢個要求呢？他日如果改返日文要求，甚至減低要求，以至入境後補返日文班，咁咪可以同楓葉國袋鼠國搶人才啦。
呢樣嘢都係因為全球有肺炎，發達國家經濟大受打擊，佢地都要搵方法去「吸水」。有乜嘢好得過，用一個仁義道德嘅理由，去搵有錢嘅移民來幫手撐住個經濟？外邊搵錢難唔難？梗係難啦，咁香港搵錢難唔難呢？一樣都係好難。不過，去留呢家嘢，就如同做媒人咁樣，千祈唔好指指點點，人人屋企環境唔同，個個都有盤算，大家自己衡量啦。
倫敦大學亞非研究學院法律系博士