上周G20峰會，素來係大國之外交盛宴，吹水居多。但今次美中兩個大帝就響晚宴(圖)交鋒。最後就係將一月一日之新關稅開設期限，延後九十日。好似有成果？
咁九十日點計先？有人話，由下年一月一日起，即係去到三月三十一號。咁樣就好了，因為過埋年仲可以有時間部署。點知真．白宮發言人話，唔係一月一日起計，係由兩位大帝會面日起計，即係二月底。睇完真係頭都痕。香江廠佬究竟要過年前部署，定係過完年先算呢？搬唔搬去東南亞呢？真係生死存亡之秋也。
兩國大佬打交，美帝傳媒照例搵人問前程。剛好美帝前財長Henry Paulson發表演說，警告兩個大國唔好打「經濟冷戰」。Paulson長期響北方大國做生意，遊走中美二十幾年，華爾街傾中路線代表。幾十年來賺盡北方大國友誼兼搵水。美帝有說，正所謂「有Paulson，冇頭痕」，同香江之「有茂波冇失拖」有得fight。當然，Paulson都係勸美中巨頭，美帝讓些少，巨龍讓多多，咁就super唔好搞冷戰，齊齊發大財。依家呢啲華爾街傾中聲音，真係少見。患難見真情，Paulson算係喊打喊殺之中，肯幫下北方巨龍講幾句，真係頒個「最佳勇氣獎」畀佢。
美帝依家經濟揸旗嗰個叫納瓦羅，當日峰會就坐響侵侵隔籬冇遠，陰沉咁嘅樣。呢位經濟學者，二十幾年前已經話北方大國威脅美帝安全，當時潮流要傾中，個個經濟學者仲笑佢一士諤諤，聽完錯愕。點知風水輪流轉，依家侵侵要反中，於是個個跟住反中，納瓦羅搖身一變，指點江山。侵侵身邊有兩件猛將，埋到身至有偈傾。左邊門神叫博爾頓，右邊門神叫納瓦羅。以前佢地係各自專業領域之支流，依家就變成政策主流。老老實實，呢個時勢，仲邊有人「傾中」？智庫如是，大學如是，學者如是。連政治學大師鑽石教授(Larry Diamond)依家都話要對中硬起來，立場轉為強硬。依家響學界搵食，就要響傾中同埋親美作出選擇。既然要響英語世界立足，依家唔跟潮流走，隨時沒頂。西瓜偎邊一瓣？你話呢？
英帝依家好頭痕，因為國會傾緊英帝退歐方案，下周二表決。唔係好多人記得，May姐依家之保守黨，其實係同北愛統一黨一齊聯合執政。過唔過都好，May姐都要下台。如果國會通過單「刁」，May姐可以望捱多兩年等大選大輸下台。如果唔通過，佢都要提早大選落台。反正都要下台，所以佢係背水一戰，但情況唔樂觀，因為黨內反May姐班議員，有二十幾件，上次佢地逼宮不成，今次會唔會仲撐May姐？睇怕唔會。工黨一定反對，北愛統一黨又唔like單「刁」，下周二May姐隨時會輸。但英帝政治，千變萬化。May姐係靠逆境波上位做首相，佢一定輸？唔好咁早下定論！