點解到依家仲有人認為，美帝對中的政策，只係侵侵個人的行為，而唔係西方世界對中政策的一個轉向呢？
因為唔少人仲封鎖響三十年前的框架，唔認為美帝對中政策的轉變，係一個實質的轉向。三十年前的框架係，大抵係響六四同埋蘇共瓦解倒台之後，西方曾經對中採取比較強硬嘅政策，但後來西方主流說法係，只要繼續同北方大國互動，就可以推動一種變革，等北方大國慢慢地融入西方大國的體系。用北方大國當時的說法，係一種「和平演變」。
三十年後之今天，大家都理解到，「和平轉變」唔存在，反而係美帝等出現咗「和平轉變」：變得更大膽地向發展中國家做經濟掠奪，並且又因為佢地之霸權，催生咗針對美帝等國家嘅恐怖主義，令到美帝等為咗打擊伊斯蘭國等恐怖組織，響唔同地區駐軍，而恐怖主義分子響西方大國搞恐怖襲擊，搞到美帝等國家表面社會和平，但其實有軍隊響國外打仗。
北方大國冇走向更民主，反而更有自信地利用派錢資助援助等手法去開拓唔同地區及國家之關係，最終觸碰到美帝等國之利益。咁依家呢個「毛民」（moment），正正係互相拔出寶劍之時。咁老老實實，即使唔係侵侵上台，美帝等西方國家唔會坐視不理，到咗呢個時勢，就會對北方大國郁手。可能唯一唔同之處，係美帝如果由民主黨執政，力度可能會打啲折扣，領袖講嘢冇咁文質彬彬有啲教養，唔似得侵侵咁樣，粗鄙當金句，有權用到盡而已。
香港究竟係點樣呢？老老實實，香港以前係英帝之殖民地，當時政府梗係食住英帝條水，企響英帝嗰邊，但另一邊廂，唔少香港人都係精甩尾，又同北方大國做生意搵食賺錢，搵盡兩邊著數。不過，依家似乎形勢好唔同。其一，無論美帝同北方大國，依家都係強者當道，唔會畀香港人玩左右逢源，一定會叫你清晰表明立場，講清楚自己企邊一度，冇得含糊。
其二，依家美帝等有理冇理，一定會搵一啲嘢出嚟搞，搵一啲籌碼，例如搵一啲「代理人」出嚟，響香江嘈下嘈下，激嬲北方大國。於是，香江人士就會思考，美帝等會唔會響香港搵「代理人」呢？咁香江人應該係小心警惕美帝人士之操作，抑或係主動幫手，又或者唔幫手不過唔表態呢？問題係，喂阿哥，北方強國畀咗咁多荷蘭水蓋畀你香江佬，係會要求閣下，除咗認真做好政治表態之後，仲有政治任務要打美帝之時，都要企出嚟大大聲叫打倒美帝。香江人唔知會唔會習慣呢種反美動員及行動呢？
所以，香江已經好難話好似前咁樣，畀你香江人響英帝殖民體制下玩盡兩岸仲要齊齊搵水。依家侵侵動真格，大家有排煩矣。