英帝的一份報告，激到好打得彈起，發言批評云云。其實呢件原本只是雞毛蒜皮，一個失意退休政客的言論，不該刻意去鬧。反而領導一鬧，大家注視番英國佬講乜，都幾弊。
英帝以前講，對香港有「道義的責任」，真係由細聽到大。依家幾十年，大家有眼見，所謂道義責任，其實係毫無責任，老老實實，由九七年到依家，響大是大非的問題上，有關香港民主自由之價值受到威脅之時，究竟英帝有發過乜嘢聲呢？如果有發過聲，究竟佢又發過幾大聲呢？
大家要理解，英帝對港政策，一直都唔會太受政黨更替的左右。好多人響度會拗，唔係呀，工黨執政嗰陣，係迫香港做咗好多社會改革，我唔係指呢啲嘢。反而係響大事件大立場之事，英帝政府係相當一致嘅。例如，響香港處理對北方大國之態度，香港響北方強國之定位，又或者香港之民主步伐等等。既然係咁，大家又點會相信，一個失意退休政客又點可以改變英帝政府之國策呢？我地反而要問，響呢個時候仲利用香港之社會及政治氣候，不斷猛講支持香港，究竟係做乜嘢呢？
另一個地方，就係好多時，大家聽到台灣依家綠營政府經常講嘅，就係香港同果邊，大家都係爭取同相當尊重一啲價值，例如民主自由人權等等。講到呢度，果邊政府就會提到，兩地人民有同樣之訴求，當然日後會有更多嘅交流及合作云云。
我當然唔係撥冷水。全世界，我估大部分都唔會反對民主自由人權呢啲價值。咁問題係，既然會講到呢啲嘢同埋兩地之民間交流，咁我又唔知點解好有記性，當香港響呢度有民主自由受到壓制之時，綠營政府，無論係阿扁年代以至依家，又幫過香江市民有幾多呢？我估大抵都係，無論係之前藍營同綠營政府，政黨輪替又好，對港政策之底線大家都差唔多。因為香江已經係北方大國之土地， 藍綠政府對香江之政策，其實係響兩岸事務之大框架內發思考同推動。表面上，香江有所謂「一國兩制」之政策，香江好多事務有好大之彈性。但係，既然香江都係北方大國之土地，咁發展同香江關係，又一定唔能夠脫離兩岸關係之框架。咁樣落去，其實無論藍綠兩營，對港之政策都係經貿搵食為主，亦唔會特別去聲援或者干涉香江事務。
所以，當綠營忽然間對香港咁有興趣，我都係小人之心，覺得綠營借擴大台港兩地之交流，聯合香江政界人士，齊齊「制中」，即係制約北方大國。但係，同英帝一樣，又係口惠實不至。如果台灣佬真係重視香港，點解綠營版本之《難民法》將香江市民排除於適用名單呢？
英帝同綠營都想「借港制中」，大家明白未？