又有港人揚威國際，Ray都感與有榮焉。港產指揮及作曲大師麥家樂(Gustav)最近贏得「奧地利音樂劇院獎」特別獎，成為首位贏得呢個獎嘅華人，月中更會飛到當地領獎和表演，有此殊榮，據了解中聯辦文化部人員都會一同到奧地利撐場，認真唔簡單。
大師昨日宴請傳媒，席間佢同阿Ray講，佢1976年離港到歐洲深造，當初冇諗過一走就35年，由演奏小提琴到學指揮及作曲，直到2011年回流香港。佢話，回流係希望幫到有潛質嘅香港音樂家，更想於香港推廣古典音樂。大師有感而發話，好多家長都只係當音樂係考名校嘅工具，Ray亦深有同感，皆因香港好多學童花好多時間學音樂，只求CV寫得靚，但就好少會買飛去捧場聽下古典音樂會。
好多人話唔識聽古典音樂，大師就話聽古典音樂唔使點樣特別學相關知識，「你覺得開心，呢個音樂咪開心。」仲話好嘅音樂可以引起聽眾共鳴，提升人嘅氣質，身邊嘅麥太黃家舜就話，港人壓力大，古典音樂正正可以幫人放鬆，仲笑言「聽到你可以瞓着覺，即係好relax啦」。