記得細細個好期待屋企人買冰皮月餅返嚟，即使未到中秋都會俾我全部食晒！年少無知，次次見到傳統月餅都翻眼白，覺得只有「老餅」先會欣賞。點會諗到今時今日一盒老字號傳統月餅已經炒到幾倍價錢，想食都難。
上星期獲奇華邀請，齊齊體驗傳統月餅同奶黃月餅嘅製作。(好啦，可能又同人老咗有關，兩款我都鍾意，反而對冰皮月餅已經完全零興趣。)有餅家顧問同小鮮肉師傅指導，即刻人人「阿茂」上身！傳統月餅餅皮用糖漿、油同麵粉開成，淨係搓個皮都玩足10分鐘，難度唔高。不過，包餡先係打大佬嗰part，要將兩粒鹹蛋黃包入重近200克的蓮蓉，再包上薄薄餅皮。現場所見，10個有10個都包咗雲石紋，即係包到飛晒餡咁。嗱，雲石紋都有雲石紋嘅靚，掃埋蛋漿都唔係好覺啫！個個包餡都向師傅求救，可想而知有幾咁難搞！餅家每個出品嘅月餅都咁完美無瑕，就知師傅功架十足啦！
你都想做下阿茂跟小鮮肉整餅？聽講10月中有新嘢玩！大家密切留意啦！奇華餅家 2785 6066