潮流興到外地跑馬拉松，日本出名氣氛好，昨日就有好幾個馬拉松舉行，最hit應該係京都馬拉松，但一班香港跑友響應「馬拉松看世界」FB專頁的號召，就拉隊去咗九州熊本縣，不特止報名跑馬拉松，更帶上千多塊熊貓曲奇，代表來自香港的祝福，送給當地沿途打氣的居民，特別是小朋友。
搞手之一莊曉陽話，今次係去年熊本地震後首個馬拉松活動，佢哋之前於香港已經組織咗一次熊本地震支援跑籌款，今次有位日本朋友話香港的奇華熊貓曲奇好可愛，佢認得呢個香港品牌，於是嘗試找奇華餅家贊助，對方爽快答應，於是自己搞埋包裝設計，人多好辦事，就咁十幾人帶埋包裝好的熊貓曲奇出發，邊跑邊派曲奇，當中來自香港的Iron Man鐵甲奇俠都出動，連當地傳媒亦有報道呢班香港親善大使！