我都知「隱世」呢個字已經用到極濫，但今次介紹嘅呢間法國餐廳的確好隱世，問10個朋友只有1個聽過，而聽完我介紹而去試嘅朋友仔，就個個都大讚驚喜！
位處九龍灣高銀嘅Le Pan，真係唔係特登搭車入去都未知道佢嘅存在(更加唔知原來高銀入面咁多餐廳，佢間日本餐廳都好正)，白色雲石設計簡潔而高貴；晏晝個落地大玻璃折射出陽光，好chill好舒服；夜晚更加唔使講啦喂！成個氣氛勁浪漫！才藝洋溢嘅小鮮肉總廚Edward Voon將傳統法國菜加入亞洲風格和食材，每道菜都靚到好似藝術品咁，堅唔捨得放入口！由魚子醬、海膽、牡丹蝦刺身同龍蝦啫喱組成嘅招牌菜式，一匙舀到底，每一啖都食到各種食材嘅鮮甜，細細品嘗仲會嗒到柚子味，原來係有提鮮作用！感覺更清新！Lunch Tasting menu每位$980，價錢唔係大眾化。不過，過時過節生日周年拍拖紀念求婚追女仔道歉報恩絕交復合認錯等等，去Le Pan啦！包你即刻和好如初錦上添花。
LE PAN
九龍灣啓祥道17 號高銀金融國際中心大堂樓層 3188 2355