葵涌人宵夜必去之一嘅串串居串燒專門店，幫襯嘅以年輕人為主，唔少都拍住拖去sweet sweet咁去；亦有成班後生仔打完波「圍威喂」咁，邊飲啤酒邊吹水。
OT到凌晨如我，去食個晚飯就真係perfect池。想慳嘅叫碗$40有找嘅拉麵就得；想慢慢啤啤佢，叫啲串燒送酒就一流！不過閒閒哋都成四百幾落樓！抵唔抵見仁見智啦！每次都一定叫泰式酸汁五花腩串，肥瘦相間，燒至外皮香脆，入口即溶。肥？咪玩啦！怕肥學咩人食宵夜？燒菠蘿(頂唔順肉桂味記得叫師傅走肉桂，因為佢真係好鬼大方，落勁多俾你，味道係勁濃……)同茄子都係必食推介！
青春之處，在於大媽店員好有性格，趕住放工，會叫食客：「唔好嗌串燒啦，有排等！見你咁餓，食麵啦！」以為佢媽媽mode關心下打完波嘅𡃁仔啦，你錯喇！佢對個個(even中佬)都係咁講，佢係真心趕住收工，因為佢一邊落單一邊哦你！嗱！呢啲真性情，我buy！另一青春之處，就係班打完波嘅𡃁仔好興奮咁討論緊邊個最早做老襯(但我明明聽到好多都仲係一支公)，又粗口成文咁講緊同學仔被女狠飛嘅八卦嘢，呢個時候，坐後面嗰枱嘅大叔一路搖頭一路咿咿哦哦喪插佢哋有幾嘈。你有你嘈，佢有佢哦，我有我隊啤，好草根，好地踎。
串串居串燒專門店
葵涌道1009號珍寶大樓地下E舖(光輝圍內)
