系列fans又愛又怕嘅《人中之龍》最新正統後繼作品《人中之龍7》終於都推出咗，土下座都係等到頸長，今集由全新主角春日一番嘅造型，到遊戲玩法由ACT變成RPG，加上前作《人龍6》無論銷量同口碑都係新低，今集可以話係響超大量惡評下誕生。或者大家同我一樣，都會好奇點解製作人名越稔洋可以大膽到將一套已有近15年歷史嘅遊戲完完全全咁改頭換面？與其講不如直接做，結果係，今集完全肯定到名越嘅才能絕對不只限於玩弄小情小趣，佢認認真真咁做一隻RPG、再認認真真咁寫一個正常製作人無可能容許佢面世嘅故事：一個坐咗18年監連電話都唔識用嘅垃圾古惑仔，一個街邊執垃圾食嘅乞兒，一個俾同行排擠60歲失業連退休金都冇埋嘅差佬，佢地點樣響絕望嘅人生中生存。重點係，呢三個加埋過百歲嘅男人，你話有金城武同木村咁靚仔都可能會引到你玩，但事實係全部都樣衰核突兼口臭，見到唔開胃，但偏偏一路玩落去，會慢慢發現今集實在係極度高質！(下回再續)
日報