諗落已經有最少兩年冇去E3，今年全球受疫情影響下，呢個最大型之一嘅遊戲展亦理所當然變成網絡直播。截稿時剛剛完咗Ubisoft Forward同Xbox & Bethesda Games兩個大型發布會，亦簡單講今屆E3一連四日都有唔同公司做線上直播，除咗剛剛提過嘅兩間公司外，仲有Take-Two、CAPCOM、任天堂等，唔多瞭解遊戲公司冇問題，都係睇睇有咩game先。
先講Ubisoft都係以量取勝，但都係見慣見熟嘅IP所以日後再講，比較意外係有隻2009年電影《Avatar》嘅改編遊戲，另外《Mario+Rabbids》都有新作登場(第一集都相當唔錯)。跟住就係收購咗Bethesda及全力推動Game Pass嘅Xbox，雖然真正獨佔唔多，但一如預期遊戲陣容氣勢驚人，眾多新作如《Age of Empire IV》、《The Outer Worlds 2》、《Battlefield 2042》等消息都令人興奮。比較失望係依然冇《The Elder Scrolls 6》消息，但Bethesda正式將同樣喺2018年公布嘅全新IP《Starfield》，終於交到大家面前。以外太空、宇宙為題材，相信絕對有機會成為又一名作，而且預定明年11月就有得玩，至少有個日期可以等下，不過亦係理所當然，「Xbox及PC獨佔」！
