EC職場周記—合法地「飛髮」
【一切從「頭」開始】
楚丁：「崔經理早晨！呢個感覺好陌生！唔知關咩嘢事呢？」
畢哥：「吖！妳個楚丁！雖然我未有機會俾利是妳，但妳都唔洗窒頭窒勢㗎！係咪想搵個機會等我同妳開年？」
楚丁：「唔係！唔係！唔敢！唔敢……崔經理！你講開『窒頭窒勢』嗰『頭』字，我留意到啦！你飛咗髮！新形象！所以有啲陌生啫！」
【唔知下次幾時才飛髮？】
畢哥：「梗喺啦！噚日開始唔可以飛髮嘛！我一聽到消息，前晚最後機會，髮型屋鬼咁多人，我排到十一點幾……師傅仲話：『過咗零晨十二點就唔准飛，因為法例經已生效！唉！仲有排開唔到鋪……』咁樣嚇我一嚇，輪到我時，咪叫佢『可剪盡剪』囉！我都驚飛埋呢次就唔知要等幾耐？」
楚丁：「唔緊要啦！咁咪幾好！由讀大學識你到依家，都未見過你短頭髮！咁咪當乘機改變吓形象囉！」
畢哥：「唉！唔好再提我嘅傷心事啦！就係前晚飛到咁短之後，我一路上都覺得：途人、屋企樓下管理員……都笑緊我！返到屋企，家人都問我搞邊科？唉！所以我琴日咪在家工作，避免返公司見到妳哋囉！」
楚丁：「有無咁誇張呀！咪幾有型！咪疑神疑鬼啦！吖！講講吓我又諗到第二種陌生嘅感覺啦……就係依家都只喺8:40，你從來未試過咁早返公司嘅！」
畢哥：「妳今朝好似有心同我作對咁！句句都窒住晒！不過，話分兩頭，朋友即是朋友，俾妳識穿咗！我喺特登咁早返嚟㗎……」
楚丁：「喺咪呢！講中晒！你今朝仲早過碧姐，真喺破晒紀錄！咁你究竟有咩居心呢？講嚟聽吓！最多應承幫你保守秘密啦！」
畢哥：「咪又係關嗰頭事囉！首先早啲返，避開晒平時食早餐、搭車撞慣嗰啲人……另外，我今朝約咗嗰客11:00開zoom嘅會……」
楚丁：「喺囉！開zoom會更加唔洗返嚟啦！你喺咪諗錯嘢呀？」
畢哥：「梗喺冇諗錯嘢！不過就有『帶漏嘢』！噚日因為嗰頭冇返嚟，咪拎唔到份文件囉！最衰之前鎖咗喺櫃桶，如果唔係，我實打電話返嚟叫妳幫我scan，我就慳番唔洗返嚟！洗乜搞到破紀錄咁早吖！」
【化危為機】
楚丁：「原來喺咁！一項法例嘅生效，對你嘅影響就咁大！」
畢哥：「咁妳呢？妳上次過年前想染髮，因為太多人，髮型師叫妳過咗年先，咁現在暫停營業，咪有排冇得染囉？」
楚丁：「咁又唔喺喎！啱啱相反！噚日我嗰髮型師whatsapp我，佢話：『由於法例把髮型屋納入表列處所，暫停營業，及後……』」
畢哥：「呢啲喺人有睇新聞都知啦！」
楚丁：「咁又唔喺喎！佢仲話：『考慮到政策的不確定性和某些未能符合疫苗氣泡的客戶需要，本店的髮型師將會經公司中央預約，提供上門服務！除了營業時間更具彈性外，全店的髮型師皆會提供疫苗接種紀錄、最近3日的檢測報告，以及相應的消毒/清潔設備……」
畢哥：「嘩！咁咪非法地『飛髮』？」
楚丁：「邊有『非法』呀？在私人地方，人數又少……又唔會累積等候嘅客人，我覺得仲方便咗、同埋安全咗！有預約兼且營業時間彈性就最啱我呢種『加班一族』啦！」
畢哥：「咁費用方面點計呀？送到上門喎！梗喺好貴啦！」
楚丁：「崔經理喺市場部經理果然名不虛傳！嗰訊息主要想爭取一班忠實客戶，原本上門服務要加收100%，但依家推出早鳥優惠套票；若果以一本10張嘅套票為例，只需多收50%就可以啦，有效期仲有12個月！一張票夠飛髮，兩張票就夠染髮……我計過：12個月內，我剛好用晒一本！到時，就算政策放寬返，我可能都會約佢上門，因為我經常加班，時間難就……」
畢哥：「嘩，妳間髮型屋幾有腦喎！化危為機！人哋關門冇工開，佢一本套票仲要收足15次服務費……」
【飛髮新常態】
楚丁：「各展所長啫！咪再冤枉人哋『非法飛髮』啦！佢哋喺：『合法食腦香港人』就真！」
畢哥：「喂楚丁！我依家趕住執文件開會，唔傾住，妳可唔可以……」
楚丁：「幫你叫早餐？」
畢哥：「都好！我的確未食早餐……不過，我想妳幫我買多本飛髮套票就真，唔知我住嗰區包唔包上門呢？」